Қазақстанда қалдықтарды энергияға айналдыратын екі ірі зауыт салынады

ERNUR.KZ. Қазақстан Республикасының Экология және табиғи ресурстар министрлігі, "Shaanxi Construction Engineering Kazakhstan Co., Ltd" ЖШС және "East Hope" ЖШС қалдықтарды энергияға айналдыра отырып кәдеге жарату зауыттарын салу бойынша Астана және Шымкент қалаларында инвестициялық келісімдерге қол қойды, деп жазады inbusiness.kz.

Астана қаласында тәулігіне 1 500 тонна тұрмыстық қалдықты (жылына шамамен 550 мың тонна) өңдеу қуаттылығына ие зауыт салу жоспарланып отыр. Жобаның жалпы инвестиция көлемі – 94,4 млрд теңге (≈180 млн АҚШ доллары).

Шымкент қаласында тәулігіне 1 000 тонна (жылына шамамен 360 мың тонна) қалдық өңдейтін кәсіпорын салынады. Инвестиция көлемі – 53,9 млрд теңге (≈100 млн АҚШ доллары).

"Аталған нысандардың іске қосылуы полигондарға шығарылатын қалдықтардың көлемін айтарлықтай азайтуға және экологиялық таза электр энергиясын өндіруге мүмкіндік береді", – делінген хабарламада.

Айта кету керек, бұған дейін Алматы қаласы бойынша қытайлық инвестордың қатысуымен ұқсас инвестициялық келісім жасалған болатын.