ҚР Ішкі істер министрлігі есірткі қылмысына қарсы іс-қимыл жөніндегі жұмыстың нәтижелерімен бөлісті.
ERNUR.KZ. Ағымдағы жылдың 9 айында 6 мыңнан астам есірткі құқық бұзушылық анықталды. Оның ішінде өткізу фактілері бойынша 1,7 мың, аса ірі мөлшерде есірткіні сақтаудың 300 фактісі, құрамында есірткі бар өсімдіктерді өсірудің 379 фактісі, контрабанданың 117 фактісі тіркелді. Бұл туралы ОКҚ алаңында өткен баспасөз конференциясында ҚР ІІМ Есірткі қылмысына қарсы іс-қимыл комитеті төрағасының орынбасары Қуандық Әлжанов мәлімдеді.
Полицейлер есірткінің 26 тоннадан астам түрін тәркіледі, бұл ұқсас кезеңнің көрсеткішінен 35%-ға артық. Оның ішінде 9 тоннадан астам марихуана, 600 кг астам гашиш, 1 тоннадан астам синтетикалық есірткі бар, қалғаны- каннабис. ІІМ каннабис тобының есірткілері «фитолабораториялар» деп аталып кеткен жылыжайларда көбірек өсіріле бастағанын айтты. Полиция 93 зертхананың қызметін тоқтатты, бұл өткен жылдың көрсеткіштерінен 5 есе көп.
«Синтетикалық есірткі өндірісіне жеке тоқталғым келеді. Ағымдағы жылдың басынан бастап өмір бойына бас бостандығынан айыруға дейін жазаланатын есірткі өндірушілерге қатысты заң күшіне енді. Былтыр полиция 29 есірткі зертханасын жойды, ал алынған синтетикалық есірткінің жалпы салмағы 419 кг құрады. Осы жылдың 9 айының қорытындысы бойынша синтетикалық есірткі өндіретін 12 есірткі зертханасы жұмысын тоқтатты. Тәркіленген есірткінің салмағы 1 тоннадан асты, яғни 3 есеге жуық өсті. Заңсыз айналымға 3 млн бір реттік доза жіберілмеді», – деді Қуандық Әлжанов.
Сондай-ақ ІІМ есірткінің заңсыз айналымы саласында 16 ҰҚТ қызметінің жолын кесті, олардың ішінде 3 трансұлттық топ болды. ҰҚТ-ның 16 көшбасшысы мен 60 белсенді қатысушысы ұсталды. 24 тоннаға жуық химиялық заттар, оның ішінде 17 тонна прекурсорлар, сондай-ақ синтетика жасауға арналған жабдықтар тәркіленді. Сонымен қатар ведомство есірткі жарнамасын анықтау бойынша жұмыс жүргізуде. Жыл басынан бері есірткі насихаттаудың 170 фактісі анықталды.
Рейдтік іс-шаралар барысында полицейлер еріктілерді тарта отырып, 25 мыңнан астам граффити жазуы мен есірткі сайттарына сілтемелерді жойды. 26 мыңнан астам интернет-ресурс анықталды. 35 мыңнан астам карт-шот бұғатталды, ондағы 2,5 млрд теңгенің айналымына тыйым салынды.
Министрлік цифрлық платформалармен және IT-компаниялармен өзара іс-қимылды да жолға қойып отыр. Анонимді абоненттер анықталды. 750 адам, оның ішінде 32 әкімші ұсталды.
