ЕАЭО техникалық регламенттері мен стандарттары қайта қаралады

11.04.2025 09:25

181

Жергілікті мемлекеттік органдар мен ЕЭК департаменттері ЕАЭО техникалық регламенттерін тұрақты негізде жаңартып отырады.

фото: Sputnik/Ертай Сарбасов

ERNUR.KZ. Еуразиялық экономикалық комиссияның (ЕЭК) шешімімен алдағы бес жылда 29 техрегламент талдаудан өтеді. Қажет болған жағдайда тізім кеңейтілуі мүмкін, деп жазады sputnik.kz.

"Талдау барысында ескірген немесе артық талаптарды жою және оларды халықаралық стандарттарға сәйкестендіру жоспарлануда. Бұл ЕАЭО-ға мүше мемлекеттердің өндірушілері мен тұтынушылары үшін бірыңғай, түсінікті және заманауи талаптарды қалыптастыруға мүмкіндік береді", - деп жазылған хабарламада.

Бірінші кезекте бағалау жоспарына 10 жылдан астам уақыт бұрын қабылданған, сондай-ақ 5 жылдан астам уақыт бойы өзгертілмеген техникалық регламенттер енеді. Бұдан басқа, ЕАЭО елдерінен өтініштердің едәуір саны келіп түсетін регламенттер қамтылған.

Жұмысты ЕАЭО-ға мүше мемлекеттердің уәкілетті органдары бейінді ғылыми ұйымдар мен бизнес-қоғамдастықтардың өкілдерін, сондай-ақ ЕЭК-тің тиісті департаменттерінің сарапшыларын тарта отырып жүргізеді.

Мысалы, Қазақстан Республикасына 8 техрегламент бекітілген, олардың ішінде – лифт қауіпсіздігі, отынға қойылатын талаптар және тағам қауіпсіздігі бар. Беларусь Республикасы ауыл шаруашылығы техникасының қауіпсіздігі мен тамақ өнімдерін таңбалауды қоса алғанда 5 техрегламентпен айналысады. Ресей Федерациясы пиротехникалық өнімдердің, көлік дөңгелектері, балалар тауарлары мен сүт өнімдерінің қауіпсіздігін қоса алғанда 16 техрегламентті талдайды.