Фото: depositphotos.com
ERNUR.KZ. Қазақстанның Көлік министрлігі автобустарға балалар арбасымен кіруге тыйым салынғаны туралы әлеуметтік желіде тараған ақпаратқа қатысты түсініктеме берді, деп жазады Stan.kz.
Көлік министрлігі әлеуметтік желідегі автобустарға балалар арбасымен кіруге тыйым салынғаны туралы ақпаратқа түсініктеме берді.
Ведомствоның мәліметінше, бұл ақпарат шындыққа жанаспайды. Қолданыстағы ережелерде ата-аналардың балалар арбасымен қоғамдық көлікке мінуіне тыйым салынбаған.
"Автомобиль көлігімен жолаушылар мен багажды тасымалдау қағидаларына енгізілген жаңартуларға сәйкес, автобус лық толы болған жағдайда ата-анаға отыруға бос орын болған кезде балалар арбасын бүктеп алып жүру қарастырылған. Бұл ретте арба жолаушылардың еркін қозғалуына кедергі келтірмеуі керек", – деп хабарлады министрлік.
Бұл талап жолаушылардың, соның ішінде балалар мен оларды ертіп жүрген ата-аналардың қауіпсіздігін қамтамасыз етуге және автобус салонындағы еркін өтетін жолды сақтауға бағытталған.
Министрліктің мәліметінше, егер ата-анаға арбаны бүктеу ыңғайсыз болса, ол сапарын арбаны жайылған күйінде жалғастыра алады. Сондай-ақ ведомство өкілдері бұл үшін айыппұл салу, жолаушыны автобустан түсіру немесе өзге де шаралар қолдану қарастырылмағанын атап өтті.
