Алматы облысында өртке байланысты төтенше жағдай жариялануы мүмкін

ERNUR.KZ. Құжат жобасы Ашық НҚА сайтында қоғамдық талқылауға шығарылды, деп жазады inbusiness.kz.

Құжат мақсаты: "Қатты тұрмыстық қалдықтар полигонындағы өртке байланысты жергілікті ауқымдағы техногендік сипаттағы төтенше жағдай туралы халықты хабардар ету" – деп жазылған.

Қазіргі уақытта Алатау қаласының маңындағы өртті сөндіру жұмыстары жалғасып жатыр. Кеше кешке өрт орнына Өртке қарсы қызмет комитетінің төрағасы Ерлан Төрегелдиев келді.

Іс-қимылдарды үйлестіру оқиға орнында да, ТЖМ Командалық орталығынан да жүргізілуде. Полигонда өртті сөндіру жұмыстарын тәулік бойы жүзеге асыратын жедел штаб құрылды.

Өртті сөндірудің 6 учаскесі құрылды. Өрт орнында "Терең-Қара" өзенінен ашық су көзіне автомобиль-сорғы жеңін орнату арқылы магистральдық желі тартылып, суды үздіксіз жеткізу ұйымдастырылды. Бұл жұмыстарға 6 бірлік техника: бір автомобиль-сорғы жеңі және 5 автоцистерна жұмылдырылды.

Өртті сөндіруге 11 өрт оқпаны және 1 тасымалды лафетті оқпан берілді.

Өртті сөндіру өрт жүктемесімен, 10 метр тереңдіктегі бықсумен және жел бағытының өзгеруімен күрделеніп отыр.

Өртті сөндіруге Алматы, Шымкент қалалары, Қарағанды, Түркістан, Жамбыл, Жетісу және Абай облыстарының ТЖД күштері мен құралдары, сондай-ақ ҚР ТЖМ Мартбек Мамраев атындағы 52859 және Қасым Қайсенов атындағы 68303 әскери бөлімдерінің әскери қызметшілері қосымша жұмылдырылды.

Барлығы 200-ден астам жеке құрам мен 90-нан астам техника жұмылдырылды.

Өртті сөндіру бойынша барлық қажетті шаралар ТЖМ күшімен тәулік бойы орындалып отыр. Күндіз-түні құтқарушылар ошақтарды инертті материалдармен толтырып, топырақты тығыздау жұмыстарын жүргізуде. Бұл әдіс оттың бықсуын оттегінің қолжетімділігін толығымен жауып, өрттің түпкілікті жойылуын қамтамасыз етуге мүмкіндік береді.