28-29 қыркүйекте Alatau City Authority өкілдері Myron AG (Santa Capital), Rhenus, D.A.R. Metall AG, Wilo және Siemens Healthineers компанияларымен бес екіжақты кездесу өткізді.
ERNUR.KZ. Қазақстан Республикасы Президенті Қасым-Жомарт Тоқаевтың Германия Федеративтік Республикасына ресми сапары аясында Alatau City Authority Alatau City-де инвестициялық және инфрақұрылымдық жобаларды іске асыру бойынша компаниялармен бірқатар келіссөздер жүргізді. Іскерлік бағдарламаның қорытындысы бойынша ынтымақтастық туралы алты меморандумға қол қойылды.
28-29 қыркүйекте Alatau City Authority өкілдері Myron AG (Santa Capital), Rhenus, D.A.R. Metall AG, Wilo және Siemens Healthineers компанияларымен бес екіжақты кездесу өткізді. Келіссөздер логистика, қалдықтарды қайта өңдеу, инженерлік және медициналық инфрақұрылым, өндірісті оқшаулау және цифрлық қаржы салаларындағы жобаларды қамтыды.
Myron AG (Santa Capital) компаниясымен нақты активтерді токенизациялау бойынша пилоттық жобалар және Alatau City-де жобаларды іске асыру үшін трансшекаралық қаржыландыруды тарту мүмкіндіктері талқыланды.
Rhenus-пен келіссөздер барысында Байсерке станциясындағы компанияның қолданыстағы терминалымен интеграциялана отырып, А класындағы қойма объектілерін және тарату орталығын құру перспективалары қарастырылды. Сондай-ақ, терминалға жүктерді жеткізу үшін ұшқышсыз технологияларды қолдану мүмкіндігі талқыланды.
D.A.R. Metall AG компаниясымен Alatau City кәсіпорындарының қайталама шикізатты одан әрі пайдалану мүмкіндігімен тұрмыстық және өнеркәсіптік қалдықтарды қайта өңдеу кешенін құру перспективалары пысықталды. Компания сонымен қатар құрылыс саласы үшін композиттік материалдар өндірісін дамытуға қызығушылық білдірді.
Wilo компаниясымен кездесуде Alatau City-де сорғы жабдықтарының сервистік және инженерлік орталығын құру талқыланды. Жоба жабдыққа техникалық қызмет көрсетуді және мамандар даярлауды, өндірісті оқшаулауды одан әрі кеңейту мүмкіндігін көздейді.
Siemens Healthineers компаниясымен Alatau City-де компанияның кеңсесі мен сервистік орталығын ашуды, сондай-ақ қаланың медициналық кластерін дамытуға қатысуды қоса алғанда, денсаулық сақтау саласындағы стратегиялық ынтымақтастықтың ықтимал бағыттары қаралды.
«Германиялық компаниялармен келіссөздердің қорытындысы бойынша біз қаланың логистикалық, инженерлік, өндірістік және әлеуметтік инфрақұрылымын құруға нақты қызығушылық барын көріп отырмыз. Қол жеткізілген уағдаластықтар жобаларды одан әрі егжей-тегжейлі пысықтауға, оларды іске асыру тетіктерін айқындауға және Alatau City-ді дамытуға германиялық технологиялар мен құзыреттерді тартуға негіз жасайды», – деп атап өтті «Alatau City Authority» арнаулы басқару ұйымының бас атқарушы директоры Әлішер Әбдіқадыров.
Қазақстан-Германия бизнес-форумы аясында Alatau City Authority германиялық компаниялармен ынтымақтастық туралы алты меморандумға қол қойды. Уағдаластықтар Wilo сервистік орталығын құру, Rhenus-пен бірлесіп логистикалық инфрақұрылымды дамыту, D.A.R. Metall AG-мен тұрмыстық және өнеркәсіптік қалдықтарды қайта өңдеу, SBP-Management-пен денсаулық сақтау саласында мамандар даярлау, Schlaich Bergermann Partner (SBP)-мен күн энергетикасы, құрылыс және жобалау шешімдерін сараптама жүргізу саласындағы ынтымақтастық, сондай-ақ KazPetFood пен Wagner Feedmill & Silo Plants арасындағы үй жануарларына арналған жем шығаратын зауытқа жабдық жеткізу жөніндегі өзара іс-қимылды көздейді.
Іскерлік бағдарлама барысында Rhenus, Wilo және D.A.R. Metall AG өкілдері тиісті жобаларды Alatau City-де іске асыруға мүдделілігін растады.
Қол жеткізілген уағдаластықтар германиялық технологияларды, құзыреттер мен инвестицияларды тартуға, Alatau City-дің заманауи инженерлік, логистикалық, экологиялық және әлеуметтік инфрақұрылымын дамытуға бағытталған. Келесі кезең – жобалардың параметрлері мен оларды іске асыру тетіктерін егжей-тегжейлі пысықтау болады.
