Ақтауда қарумен жүрген ер адам ұсталды

ERNUR.KZ. Маңғыстау облысында полиция қызметкерлері «Құқықтық тәртіп» жедел-профилактикалық іс-шарасы кезінде қару асынған ер адамды ұстады, деп жазады Azattyq Rýhy.

Облыстық полиция департаментінің мәліметінше, ер адамды тексеру барысында оның курткасының ішкі қалтасынан ақ түсті пакет табылған. Оның ішінде 16 калибрлі аңшы мылтығының кесілген бөлігі болған.

Тәркіленген қару сараптамаға жіберілді.

Күдіктіге қатысты ҚР ҚК 287-бабының 2-бөлігі («Қаруды заңсыз сақтау») бойынша қылмыстық іс қозғалды.

Соттың шешімімен оған елден шықпау және тиісті мінез-құлықты сақтау туралы қолхаттүріндегі бұлтартпау шарасы тағайындалды.

Аймақтық полиция өкілдері мұндай іс-шаралардың басты мақсаты – азаматтардың қауіпсіздігін қамтамасыз ету және құқықбұзушылықтардың алдын алу екенін атап өтті.

«Заң және тәртіп» қағидасына сәйкес, құқыққа қарсы әрекеттерді тоқтату жұмыстары жалғасады», – делінген полиция хабарламасында.

Қазақстанда қаруды сақтау, алып жүру және қолдану қатаң түрде заңмен реттеледі. Қару айналымына қатысты заңсыз әрекет жасағандарға айыппұлдан бастап бас бостандығынан айыруға дейін жаза қарастырылған.