Надежда Лушникова 1940 жылы 22 қарашада Алматы облысы Қаскелең ауданы Шамалған ауылында туған.
Фото әлеуметтік желілерден алынды
ERNUR.KZ. Айтыскер ақын Надежда Лушникова 86 жасқа қараған шағында өмірден өтті. Бұл туралы Қазақстан Жазушылар одағы хабарлады, деп жазады tengrinews.kz.
Надежда Лушникова 1940 жылы 22 қарашада Алматы облысы Қаскелең ауданы Шамалған ауылында туған. Қазақ ортасында тәрбиеленіп, қазақша оқып, білім алған.
Ол 1961 жылы Қызылордадағы М.Мәметова атындағы педучилищені, 1969 жылы Абай атындағы Қазақ педагогикалық институтының филология факультетін (қазақ бөлімін) бітірген.
Лушникованың шығармашылық жолында айтыс ерекше орын алды. Бұл сайыста тек өлең шығару шеберлігі емес, сонымен қатар суырып салып айту қабілеті де аса маңызды.
1963 жылы Қызылордада облыстық айтысқа қатысып, жүлдегер болды. Шымкенттік Қалдыбек Әліқұловпен айтысы киноға түсірілді. Ақындар бәсекесі режиссер Т. Дүйсебаевтың "Айтыс" фильміне енген.
Кейін Лушникова ақындар айтысына қатысуын жалғастырған. Ол 1965 және 1978 жылдары Жамбыл аудандық, 1977 және 1979 жылдары Алматы облыстық айтыстарға қатысып, әріптестерін жеңген.
Мұғалім болып, музейді басқарған
1963 жылдан 1985 жылға дейін Надежда Лушникова газетте штаттық тілші, баспа үйінде редактор және мектепте мұғалім болып жұмыс істеді. 1985 жылы ол Жамбыл ауданындағы Үмбетбай Кәрібаев мұражайының меңгерушісі болды.
Лушникованың алғашқы өлеңдері 1958 жылы Қызылорда облыстық "Ленин жолы" газетінде жарық көрді. Кейінірек оның "Елім менің" (1962) және "Көңіл хошы" (1970) атты екі өлең жинағы шықты. Екінші кітабы үшін ақын Қазақстан комсомолының сыйлығына ие болды.
