​Лондонда еврей қайырымдылық ұйымына тиесілі 4 жедел жәрдем көлігін өртеп кетті

ERNUR.KZ. Лондонның солтүстігінде еврей қайырымдылық ұйымына тиесілі төрт жедел жәрдем көлігі өртелгеннен кейін екі адам ұсталды, деп жазады inform.kz.

«Хацала» жедел жәрдем қызметінің көліктері еврей қауымы тығыз қоныстанған Голдерс-Грин ауданында дүйсенбіге қараған түні өртелген. Бұл оқиға антисемитизм негізіндегі өшпенділік қылмысы ретінде тергеліп жатыр.

Сәрсенбі күні таңертең Лондон полициясы қаланың солтүстік-батысында 47 жастағы ер адамды, ал орталық бөлігінде 45 жастағы тағы бір күдіктіні ұстады. Екеуінің де Ұлыбритания азаматтары екені хабарланды.

Аудандық полиция басшысы, бас суперинтендант Джейсон Стюарт Би-би-си арнасына берген сұхбатында бұл ұстауларды тергеуде барысындағы маңызды қадам деп бағалады. Сонымен бірге ол полицияда тағы бір ер адамның бейнесі түскен бейнежазбалар бар екенін айтты.

— Еврей қауымының қауіпсіздігіне ерекше мән береміз. Осыған байланысты біз осы аптада қауіпсіздік шараларын күшейттік және оны алдағы апталарда — Песах мерекесі кезінде және одан кейін де жалғастырамыз. Қауіпсіздікті қамтамасыз ету үшін бар күшімізді саламыз, — деді ол.

Митрополит полициясының терроризммен күрес бөлімінің басшысы Хелен Флэнаган тәртіп сақшыларының қолында «кемінде үш адамның қатысы бар екенін көрсететін» бейнежазбалар бар екенін мәлімдеді.

— Жергілікті тұрғындардың алаңдаулы екенін толық түсінеміз. Тергеу қарқынды жүріп жатыр. Біз бұл іске қатысы болуы мүмкін барлық тұлғаларды анықтап, оларды ұстау жұмыстарын жалғастырамыз, — деп қосты ол.