ТҮРКІСТАН: Тау туризмін дамыту жұмыстары жан-жақты талқыланды

Нұралхан Көшеров жауапты басқармалар мен құзырлы органдардың басшыларымен арнайы жиын өткізіп, тау аймақтарында демалыс нысандарын салу тәртібін, жаңа талаптар мен қауіпсіздік мәселелерін жан-жақты талқылады, деп хабарлайды ERNUR.KZ.

Түркістан облысында таулы аймақтардағы демалыс орындарын дамыту мәселесі күн тәртібіндегі маңызды бағыттардың бірі. Осыған байланысты облыс әкімі Нұралхан Көшеров жауапты басқармалар мен құзырлы органдардың басшыларымен арнайы жиын өткізіп, тау аймақтарында демалыс нысандарын салу тәртібін, жаңа талаптар мен қауіпсіздік мәселелерін жан-жақты талқылады.

Жиында таулы өңірлердегі туризмді дамыту барысында ең алдымен қауіпсіздік талаптары мен заңдылықтың қатаң сақталуы қажеттігі атап өтілді. Әсіресе табиғи ерекшеліктері күрделі аймақтарда демалыс орындарын салу кезінде су тасқыны, сел, көшкін секілді табиғи қауіптердің алдын алу мәселесі басты назарда болуы тиіс екені айтылды.

Облыс әкімі бұл бағытта жақында қабылданған Қазақстан Республикасының Су кодексі талаптарын қатаң сақтау қажеттігін ескертті. Жаңа құжат су ресурстарын тиімді пайдалану, өзен-көлдердің табиғи арнасын сақтау және су маңындағы аумақтарды қорғау мақсатында нақты талаптар мен шектеулерді қарастырады.

Жиында таулы аймақтардағы демалыс нысандарын салу кезінде экологиялық тепе-теңдікті сақтау, табиғи ландшафтарды бұзбау және қоршаған ортаға келетін ықтимал зиянды азайту мәселелері кеңінен талқыланды. Әсіресе су айдындарының маңында, шатқалдар мен өзен арналарына жақын аумақтарда құрылыс жүргізу кезінде қауіпсіздік талаптары мен санитарлық нормаларды толық сақтау қажеттігі атап өтілді.

Сонымен қатар заңсыз және бейберекет құрылыстардың алдын алу мәселесіне ерекше назар аударылды. Туристік нысандарды салу тек белгіленген тәртіпке сәйкес, тиісті рұқсат құжаттары мен жобалық-сметалық талаптар негізінде жүзеге асырылуы тиіс. Бұл ретте жауапты басқармаларға бақылауды күшейтіп, барлық құрылыс жұмыстарының заң талаптарына сай жүргізілуін қамтамасыз ету тапсырылды.

Аймақ басшысы туризмді дамыту экономикалық тұрғыдан маңызды болғанымен, ең бастысы – адам қауіпсіздігі мен табиғатты қорғау екенін атап өтті. Сондықтан кез келген жоба ең алдымен қауіпсіздік талаптарына, экологиялық нормаларға және қолданыстағы заңнамаға толық сәйкес болуы қажет.

Жиын қорытындысы бойынша жауапты басқармаларға таулы аймақтарда демалыс орындарын салу тәртібін жүйелеу, бақылау механизмдерін күшейту және жаңа заң талаптарын түсіндіру жұмыстарын жүргізу тапсырылды. Сонымен қатар табиғи апаттардың алдын алу, су нысандарын қорғау және экологиялық тепе-теңдікті сақтау бағытындағы жұмыстарды жүйелі түрде жүргізу қажеттігі айтылды.

Түркістан облысында туризмді дамыту – өңір экономикасын әртараптандырудың маңызды тетіктерінің бірі. Алайда бұл жұмыс қауіпсіздік, заңдылық және экологиялық жауапкершілік қағидаттарын негізге ала отырып жүзеге асырылуы тиіс. Облыс басшылығы бұл бағыттағы барлық жобалардың қатаң бақылауда болатынын атап өтті.