2026 жылы "Болашақ" бағдарламасымен оқуға түсу мүмкіндігі артады.
көрнекілік: azattyq-ruhy.kz
Көп студент үшін «Болашақ» – аты таныс, бірақ өзі алыс көрінетін бағдарлама. Біреулер оны тек «таңдаулыларға арналған» деп ойлайды, енді біреулер құжат жинау тым қиын деп бастапқыда-ақ бас тартады.
Ал шын мәнінде, 2026 жыл «Болашаққа» деген көзқарасты қайта қарауға себеп болып отыр. Себебі биыл бағдарлама бұрынғыдай жай ғана шетелде оқыту емес, нақты мақсаты бар, елге пайдасын тигізе алатын студенттерді қолдауға бағытталды. Яғни бағдарламаға қатысуға мүмкіндік артуда.
Биылғы жаңалықтардың бірі – пилоттық форматтағы гранттар. Бұл гранттар ең алдымен магистранттар, докторанттар және ғылыми бағыттағы студенттерге арналған. Әсіресе IT, жасанды интеллект, инженерия, білім беру, медицина, зерттеу салалары алдыңғы қатарға шықты. Яғни, «қай университетте оқыдың?» деген сұрақтан гөрі, «елге келген соң не істей аласың?» деген сұрақ маңызды бола бастады.
Тағы бір маңызды тұс – 2026 жылы «Болашақ» бағдарламасы тек үздік бағасы бар студенттерді ғана емес, ойы бар, жобасы бар, мақсаты анық жастарды көбірек қолдауға тырысып отыр. Егер сен ғылыми жоба жасап жүрсең, стартап идеяң болса, немесе нақты бір салада терең дамығың келсе – бұл бағдарлама сен үшін.
Әрине, талап бар. Шетелде оқып келген соң, белгілі бір уақыт Қазақстанда жұмыс істеу міндеті сақталады. Бірақ бұл талапты минус емес, плюс деп қарауға болады. Себебі сен алған біліміңді өз еліңде қолданасың, тәжірибе жинайсың, әрі мансаптық жолыңды жылдам бастауға мүмкіндік аласың.
Көп студент тағы бір қателік жібереді: «Мен әлі бакалаврмын, маған ерте» деп ойлайды. Негізінде, дәл қазірден бастап дайындалған адам 1–2 жылдан кейін әлдеқайда мықты кандидат болады. Тіл үйрену, портфолио жинау, ғылыми мақала жазу, волонтерлік немесе зерттеу жобаларына қатысу – мұның бәрі кейін үлкен рөл ойнайды.
2026 жылғы «Болашақ» – бұл жай ғана шетелге кету емес, өзіңді жаңа деңгейге дайындау. Егер сен Қазақстанда қалып, бірақ әлемдік деңгейде ойлайтын маман болғың келсе, бұл бағдарлама соған апаратын нақты жолдардың бірі.
Ең бастысы – «маған болмайды» деген ойдан арылу қажет. Себебі мүмкіндік көбіне дайын адамға келеді.
