Балалардың қауіпсіздігін қамтамасыз ету және білім беру ұйымдарын цифрландыру бағытындағы жұмыстар да қарқын алды.
Шымкент қаласында 2026–2027 оқу жылына дайындық жұмыстары барлық бағыт бойынша жоспарлы түрде жүргізілуде. Білім беру ұйымдарының материалдық-техникалық базасын нығайту, оқушыларды әлеуметтік қолдау, жаңа оқу жылына қабылдау жұмыстарын ұйымдастыру және қауіпсіз білім беру ортасын қалыптастыру негізгі басымдықтардың бірі болып отыр.
Қаладағы барлық мектептерде бірінші сыныпқа құжат қабылдау 18 маусым мен 31 тамыз аралығында жүзеге асырылуда. Бүгінгі таңда 16 мыңнан астам бала бірінші сыныпқа қабылданған. Мектепалды даярлық тобын өз мектебінде аяқтаған балалар бірінші сыныпқа автоматты түрде қабылдануда.
Жаңа оқу жылы қарсаңында әлеуметтік қолдау шараларына ерекше көңіл бөлінуде. Қазақстан Республикасы Үкіметінің қаулысына сәйкес, әлеуметтік осал санаттағы әрбір оқушыға мектепке қажетті құрал-жабдықтар сатып алу үшін 51 мың теңге көлемінде қаржылай көмек беру жоспарланған. Бұл мақсатқа жалпы 3,4 млрд теңгеден астам қаражат қарастырылған. Қаржылай көмек мемлекеттік атаулы әлеуметтік көмек алатын және аз қамтылған отбасылардың балаларына, жетім және ата-анасының қамқорлығынсыз қалған балаларға, төтенше жағдайдан зардап шеккен отбасылардың балаларына, сондай-ақ арнайы комиссия айқындайтын өзге де санаттағы оқушыларға беріледі.
Білім беру ұйымдарының инфрақұрылымын жаңарту жұмыстары да жалғасуда. Биыл жеті білім беру нысанында күрделі жөндеу жүргізіліп жатыр. Сонымен қатар алдағы жылы тағы сегіз мектеп пен Сайрам көмекші мектеп-интернат-колледжінде жөндеу жұмыстарын жүргізу үшін жобалау-сметалық құжаттар әзірленуде. Бұдан бөлек, өткен оқу жылында екі жаңа мектеп пайдалануға беріліп, бірнеше мектепте қосымша оқу корпустарының құрылысы аяқталды. Қазіргі уақытта тағы бес мектептің қосымша ғимараттарының құрылысы жүргізілуде.
Балалардың қауіпсіздігін қамтамасыз ету және білім беру ұйымдарын цифрландыру бағытындағы жұмыстар да қарқын алды. «AIQYN» жобасы аясында енгізілген биометриялық бақылау жүйесі бюджет қаражатын үнемдеуге мүмкіндік берсе, бейнеаналитика арқылы мектептердегі қауіпсіздік пен сабақ сапасына тұрақты бақылау жүргізілуде. Онлайн мониторинг барысында жүздеген сабақ талданып, педагогтерге әдістемелік қолдау көрсетілді.
«Qarqyn» бірыңғай цифрлық платформасы арқылы білім беру жүйесінің 12 негізгі бағыты толық цифрландырылды. Атап айтқанда, мектептердегі қауіпсіздік, биометриялық бақылау, тамақтануды ұйымдастыру, сабақ сапасын мониторингілеу, бухгалтерлік есеп, еңбекақы төлеу, мемлекеттік қызметтер, мемлекеттік білім беру тапсырысы және балалар контингентін басқару процестері автоматтандырылды. Жүйе жүргізген талдау нәтижесінде қаржыландырудағы, оқу жүктемелеріндегі және контингент деректеріндегі сәйкессіздіктер анықталып, оларды реттеу жұмыстары қолға алынды.
Жаңа оқу жылына дайындық аясында мектепке дейінгі білім беру ұйымдарында да жұмыстар жалғасуда. Мемлекеттік тапсырыс көлемі ұлғайтылып, жекеменшік балабақшаларда жаңа орындар ашылуда. Сонымен бірге мектепке дейінгі ұйымдарға жолдамалар беру «Balabaqsha» ақпараттық жүйесі арқылы кезең-кезеңімен жүзеге асырылып жатыр.
Шымкент қаласының білім беру саласында жүргізіліп жатқан бұл жұмыстардың барлығы жаңа оқу жылын ұйымдасқан түрде бастауға, сапалы білім беру қызметін қамтамасыз етуге және оқушылар үшін қауіпсіз әрі қолайлы білім беру ортасын қалыптастыруға бағытталған.
