Соттың пікірінше, Сауле Жұбаниязоваға қатысты істі ғана жеке бөліп қарау әзірге ерте
Фотоколлаж: Azattyq Rýhy/Әбілқасым Есентаев
ERNUR.KZ. Астанада марқұм фельдшер Ұлдана Мырзуанның қазасына байланысты сот барысында сот тергеу ісін қайта бастау туралы шешім қабылданды, деп жазады azattyq-ruhy.kz.
Бүгін сот отырысы барысында қаза тапқан фельдшердің анасының адвокаты Нұрсұлтан Орынбеков істі прокурорға жолдап, басқа қылмыстық іспен біріктіру туралы өтініш білдірді. Бұған тергеу сотының жәбірленуші Нұрпейісованың және Қалиевтер отбасының тұрғын үй кешенін салған компания мен басқа да тұлғаларға қатысты қылмыстық істі тоқтату туралы қаулыға берген шағымдарын қанағаттандыруы себеп болды.
Нәтижесінде судья Меруерт Абаева сотталушы Сауле Жұбаниязоваға қатысты қылмыстық істі басқа қылмыстық іспен біріктіру ісін шешу үшін прокурорға жолдау туралы шешім шығарды. Судья сонымен қатар сотталушы Жұбаниязоваға қатысты елден шықпау және тиісті мінез-құлқы туралы қолхат түріндегі бұлтартпау шарасын бұрынғы күйінде сақтау қажет екенін ерекше айтты.
«Бұған Астана қаласының ауданаралық тергеу сотының 2026 жылғы 1 қазандағы қаулысы негіз болды. Аталған қаулымен тұрғын үй құрылысына қатысы барларға қатысты осыған дейін тоқтатылған қылмыстық іс бойынша шешімнің күші жойылды. Сот сондай-ақ құрылыс-техникалық сараптаманың қорытындысын ескерді. Оған сәйкес, нысанның қасбетінің құлауына конструкциялық ақаулар мен құрылыс технологиясының бұзылуы сияқты бірнеше себеп қатар әсер етуі мүмкін. Қазіргі істі тек МИБ төрағасы Жұбаниязованың әрекетіне баға беру арқылы қарауға болмайды. Қолда бар құрылыс-техникалық сараптама қорытындысында нысанның қасбетінің құлауына бірнеше себеп қатар әсер етуі мүмкін екені көрсетілген. Олардың қатарында конструкциялық кемшіліктер мен құрылыс технологиясының бұзылуы да бар», – деп түсіндірді судья.
Осыған байланысты ол жағдайдың осындай күйге жетуіне қатысы бар барлық тұлғаның әрекеті заң тұрғысынан бағалануы керек екенін айтты. Соттың пікірінше, Сауле Жұбаниязоваға қатысты істі ғана жеке бөліп қарау әзірге ерте.
«Бұл қаулы Жұбаниязованың немесе басқа да тұлғалардың кінәлі не кінәсіз екенін анықтамайды. Іс бірнеше өндірісті біріктіру және қайғылы оқиғаның барлық мән-жайын толық тергеу мәселесін қарау үшін прокурорға жіберілді. Сот қаулысына процеске қатысушылар заңда белгіленген мерзім ішінде шағым бере алады», – деді Меруерт Абаева.
Айта кетейік, жоспар бойынша бүгін сотталушы Сауле Жұбаниязова сот отырысында соңғы сөзін айтуы керек болатын.
