Қазақстан халқының жан басына шаққандағы орташа ақшалай табысы 2026 жылдың II тоқсанында 410 088 теңгеге жетті.
ERNUR.KZ. Өткен жылдың сәйкес кезеңімен салыстырғанда қазақстандықтардың табысы 14%-ға өскен. Бұл көрсеткіш инфляцияны есепке алмайтын номиналды өсімді білдіреді. Сонымен қатар аталған сома бір айға емес, толық тоқсанға есептелген.
Халық табысының негізгі бөлігін еңбек қызметінен түсетін кірістер құрайды. Оның үлесі барлық ақшалай түсімдердің 72,7%-ына тең. Бұл санатқа жалақы мен өзін-өзі жұмыспен қамтудан түсетін табыс кіреді.
Әлеуметтік төлемдердің үлесі 24,2% болды. Оған зейнетақы, жәрдемақы, атаулы әлеуметтік көмек және шәкіртақы жатады. Қалған бөлігін туыстардан алынған материалдық көмек, алимент, мүліктен түсетін табыс және өзге де түсімдер құрайды.
Тоқсан қорытындысы бойынша жан басына шаққандағы орташа ақшалай шығын 358 584 теңгені құрады. Статистикада тауарлар мен қызметтерді сатып алуға жұмсалған қаражатпен қатар, салықтар, кредиттер мен қарыздарды өтеу және басқа да төлемдер ескеріледі.
Халықтың барлық ақшалай шығынының 90,7%-ы тұтынушылық шығындарға тиесілі. Оның ішінде ең қомақты бөлігін азық-түлікке жұмсалған қаражат құрайды.
Қазақстандықтар ақшалай шығындарының 50,5%-ын азық-түлік тауарларын сатып алуға бағыттаған. Қалған тұтынушылық шығындар азық-түлікке жатпайтын тауарлар мен ақылы қызметтерге жұмсалған.
Ұлттық статистика бюросы жыл басынан бері шығындарды есепке алу тәртібі өзгергенін атап өтті. Енді үйден тыс тамақтануға жұмсалған қаражат ақылы қызметтер санатына жатқызылады. Бұған дейін ол азық-түлік тауарларына жұмсалған шығын ретінде есептелген.
Деректер 12 мың үй шаруашылығының бюджеттеріне жүргізілген іріктемелі зерттеу нәтижесінде алынған. Халықтың табысы мен шығыны туралы келесі статистикалық мәліметтерді желтоқсан айында жариялау жоспарланып отыр.
