Күдікті ұсталып, кінәсін мойындады, ал қылмыстың нақты себебі әзірге жарияланған жоқ.
видеодан скрин
ERNUR.KZ. Қарағандыда саяжай аумағында болған қос адам өліміне қатысты тергеу жүріп жатыр. Қаза тапқандардың бірі – бірнеше жыл бойы басшылық қызметке байланысты өзінен бұрынғы төрағамен келіспей жүрген бағбандық кооперативінің төрағасы. Қылмыстың жаңа мән-жайы белгілі болды, деп жазады azattyq-ruhy.kz.
Қылмыс бір күн бұрын сағат 19:00 шамасында «Оптимист» бағбандық кооперативінен шығар жолда жасалған. Осыдан аз уақыт бұрын кооператив аумағында жарықтандыру бағандары мен бейнебақылау камерасы орнатылған.
Полиция мәліметінше, күдікті алдымен өзінің орнына келген 43 жастағы кооператив төрағасы Иван Коровинді атып өлтірген. Кейін саяжайдан үйіне қайтып бара жатып, кездейсоқ кісі өлтіру оқиғасының куәсі болған 55 жастағы әйелді де өлтірген. Оның денесі алғашқы құрбан болған адамның денесінен бірнеше метр жерден табылды.
Екі адамды өлтіргеннен кейін күдікті қашып кетуге әрекет жасаған. Полицейлер бейнебақылау камераларындағы жазбалар арқылы оның қозғалысын бақылап, жүрген жерін анықтады.
«Полиция қызметкерлері қылмыс жасады деген күдікпен 56 жастағы ер адамды анықтап, ұстады. Ол кінәсін мойындады. Күдікті уақытша ұстау изоляторына қамалды», – деді Қарағанды облысы Полиция департаментінің ресми өкілі Бақытжан Құдияров.
Ұсталған азамат бұған дейін бағбандық кооперативін басқарған. Иван Коровин саяжай маусымының басында төраға қызметіне келген.
Кейбір саяжай тұрғындары жаңа басшының жұмысына оң баға берді.
«Тәртіп орнатып жүрді. Бізде құбырлар жиі жарылатын, оларды ауыстырды. Оның слесарьлары жақсы жұмыс істеді, тіпті жұмыстан кейін де қалып жүрді. Көшелердегі шөпті шауып, ағаштарды ретке келтірді. Жақсы адам еді, жаман ештеңе айта алмаймын», – деді Владимир Едуков.
Алайда кооперативтің басқа мүшелері Коровин төраға болып сайланғаннан кейін су және өзге де коммуникацияларға қатысты мәселелер туындағанын айтады.
«Коровин төраға болғаннан кейін проблемаларымыз басталды. Су жоқ, коммуникациялар жоқ. Ол көп адамды ақшаға алдап кетті, сондықтан оны жақтырмайтындар көп болды», – деді Светлана Романова.
Кооперативтің бұрынғы және қазіргі төрағалары арасындағы жанжал шамамен үш жылға созылған. Ер адамдар бірнеше рет соттасып, бір-біріне түрлі талап қойған. Даудың негізгі себебі бағбандық кооперативінің басшысы қызметі болған.
Полиция қос адамды өлтірудің ресми себебін әзірге жариялаған жоқ. Тергеу жалғасып жатыр.
