Ағаш отырғызу жұмыстары 2024 жылы да жалғасын тапты.
ERNUR.KZ. Соңғы 5 жыл ішінде «Бурабай» ұлттық паркіндегі орман алқабы 3,3 пайызға ұлғайып, 79 546-дан 82 137 гектарға жетті. Яғни, мемлекеттік орман инспекторларының қызметінің арқасында жасыл желек жамылған жердің аумағы 2591 гектарға кеңейіп отыр, деп жазады inform.kz.
«Бурабай» ұлттық паркі баспасөз қызметінің мәліметінше, ағаш отырғызу жұмыстары 2024 жылы да жалғасын тапты. Бұл Бурабай ормандарының ормандарын қалпына келтірудің ұзақ мерзімді жоспарларын жүзеге асырудағы маңызды қадам болды. Биыл Ақылбай, Бурабай, Золотобор, Жалайыр, Мирное және Приозерное орманшылықтарында қызу жұмыс жүріп, жалпы ауданы 104,9 га жерге 839,2 мың қарағай көшеті егілді.
«Орманды қалпына келтіру - ағаш егуден ғана тұрмайды. Бұдан бөлек, өскінге мұқият күтім жасау. Биыл біз 333,9 гектар алқаптағы көшеттердің түбін екі мәрте қолмен арамшөптерден арылттық. Нәзік өскіннің солып қалмай, бой жазып өсіп кетуіне жағдай жасауға тырысамыз, күзге дейін күтіп-баптаймыз», - деді орманды қалпына келтіру инженері Әлия Әбдірахманова.
«Орман өрттері, аптап ыстық, адамдардың экологияға қайшы әрекеттері көшеттердің өсуіне және орманның табиғи жаңаруына теріс әсер етеді. Дегенмен, Ұлттық парк ұжымы қиындықтарды жеңіп келеді. Соңғы 5 жыл ішінде біз әр жыл сайын 65 гектардан астам аумаққа кемі жарты миллионнан көшет егіп жүрміз. «Бурабай» МҰТП қызметі басталғаннан бері жалпы ауданы 1400 гектарға жуық қарағай мен қайыңның 10 миллионнан астам көшеті егілді», - деді орман инженері.
Айта кетсек, бұдан бұрын «Бурабай» ұлттық паркінде жануарларға қажетті қысқа жем-шөп қоры жасалып жатқандығын жазған едік.
![](/assets/thumbnails/9c/9ccc81cb5695d9dd0e3600443875d8fd.jpg ""Туған анамның балалар үйіне әкеп тастағандағы түрі есімде": жас келіншек нағыз ананың қандай болатынын айтты")
