Биыл Алматы облысында тұратын 1700 әлеуметтік осал топтағы отбасыға үй беріледі

Мемлекеттік қызметкерлерді, бюджеттік ұйымдар мен спорт саласы өкілдеріне арналған «Алатау» өңірлік ипотекалық бағдарламасына 3,1 млрд теңге қарастырылып, 120-дан астам азамат баспанамен қамтамасыз етілді. Сондай-ақ әкім көлік және инженерлік инфрақұрылым мәселелеріне тоқталып өтті.

«Ағымдағы жылы 442 шақырым сумен жабдықтау жүйелері салынып, қайта жаңартылады. Нәтижесінде таза ауыз сумен қамту деңгейі едәуір жақсарады. Сонымен қатар газбен жабдықтау жұмыстары да белсенді жүргізіліп, 1,2 млн астам тұрғын көгілдір отынға қол жеткізді. Электр желілеріне бөлінген қаражат есебінен тозу көрсеткіші 72%-дан 66%-ға түсті. 2000 жылдардан бері күрделі жөндеу көрмеген автомобиль жолдары қайта жаңартылды. Мәселен, «Қапшағай-Бақанас-Қарой», «Нарынқол-Сүмбе», «Қарқара-Ереуіл», «Есік-Саймасай», «Алматы-1-Шамалған-Ұзынағаш», «Алмалыбақ-Жетісу» автомобиль жолдарының негізі ауыстырылып, жаңа асфальт жамылғысы төселді», – деді әкім.

Нәтижесінде жолдың сапасы мен қауіпсіздігі айтарлықтай артып, нормативтік талапқа сай жолдардың үлесі 95%-ға дейін жеткізілді. Алматы облысы – географиясы мен табиғи ресурстары туризмді дамытуға ерекше қолайлы, әлеуеті жоғары өңір. Бұл бағытты дамыту үшін барлық алғышарттар мен қолайлы мүмкіндіктер бар.

Бүгінгі таңда облысқа келген туристер саны 2,2 млн адамға жетіп, өткен жылмен салыстырғанда 36% өсім көрсетті. Қапшағай су қоймасы Қонаев қаласының негізгі демалыс орталығына айналды. 2025 жылғы жазғы маусымда мұнда 2 млн-ға жуық адам келіп, былтырмен салыстырғанда 20% өсімді көрсетті.

Ағымдағы жылы №5 қалалық жағажайда ауқымды абаттандыру жұмыстары жүргізілді.

Құны 83,2 млрд теңге болатын Ақтас үстіртіндегі «Oi-Qaragai» тау-шаңғы курортын кеңейту жобасы жүзеге асырылуда. Курорттың басты ерекшелігі – ұзындығы 28 шақырым болатын еліміздегі және Орталық Азиядағы ең ұзын шаңғы трассасының болуы. Сонымен қатар курорт жылдың төрт мезгілінде үздіксіз жұмыс істеп, жыл сайын шамамен 600 мың туристке қызмет көрсетеді.

Қапшағай көлі жағалауында құны 11 млрд теңге болатын «ASP-Arena» халықаралық деңгейдегі спорт аренасы, 4 мың орындық стадион іске қосылды. Мұнда ауданы 20 мың шаршы метр болатын Орталық Азиядағы ең үлкен мұз айдыны қонақтарды қабылдауға дайын.

«Облыстың туризм саласы үшін Қайыңды және Көлсай көлдерінің ерекше маңызы бар. Жаяу жүргіншілер жолдары толық абаттандырылып, Қайыңды көліне баратын 9 шақырым жолға күрделі жөндеу жұмыстары басталып кетті. Іле өзені жағасындағы «Көшпенділер» қалашығы әкімдіктің теңгеріміне алынды. Алдағы уақытта толық жаңартудан өткізу жоспарымызда бар, бұл нысан туристердің сүйікті орындарының біріне айналатынына сенімдімін», – деді спикер.

Көшпелі мәдениетті дәріптеу және туризмді дамыту мақсатында «Әлемдегі ең үлкен түйе керуені 2025» атты ауқымды мәдени шара өтіп, «Дәулет-Бекет» шаруа қожалығы Гиннестің рекордтар кітабына енді.