Бір жыл ішінде 260 бала үйден кетіп қалған: полиция ата-аналарға үндеу жасады

ERNUR.KZ. Жамбыл облысының полициясы балалардың үйден кету фактілерінің жиілеуіне байланысты ата-аналарға үндеу жасады, деп жазады azattyq-ruhy.kz.

ІІМ ақпаратынша, Жамбыл облысында жыл басынан бері 260 бала үйінен кетіп қалған. Мұндай әрекетке көбіне 11-15 жастағы балалар жиі барған. Осы жастағы жасөспірімдердің үйден кетуі бойынша 180 дерек тіркелген.

«Бұл – баланың белсенді түрде есейіп, мінезі мен көзқарасы қалыптасатын кезең. Мұндай уақытта балаға ересектердің түсінігі мен қолдауы ерекше маңызды», - дейді полиция.

16-17 жас аралығындағы жасөспірімдер бойынша 72 дерек, ал 6-10 жастағы балалар арасында 24 жағдай тіркелген. Сондай-ақ 2-5 жас аралығындағы бүлдіршіндердің де үйден кетіп қалған кездері болған.

«Көп жағдайда балалардың үйден кетуі эмоциялық себептермен байланысты. Ең басты себеп — отбасындағы жанжал. Мұндай 104 дерек тіркелген. Кейбір балалар қиын әлеуметтік және тұрмыстық жағдайларға байланысты үйден кеткен. Кәмелетке толмағандардың басым бөлігі – 220 бала – мектеп оқушысы, 45-і колледж студенттері, ал 13 бала білім беру процесіне тартылмаған», - делінген хабарламада.

Мамандардың айтуынша, мұндай жағдай болмас үшін ата-ана баламен ашық сөйлесіп, оған сенім артып, мінезіндегі өзгерістерді дер кезінде байқауы керек.

Жамбыл облысының полициясы ата-аналарға балаларына қамқор болып, қолдау көрсетудің маңызды екенін еске салды.