Қайғылы оқиға 16 наурыз күні түнгі сағат екіде Нұрсая шағын ауданында болды.
Фото: depositphotos.com
ERNUR.KZ Атырауда 12 жастағы қызының көзінше мұғалім әйелін өлтірген 63 жастағы ер адам сотталды. Кәмелетке толмаған қыз қамқоршылық органдарына берілді, деп жазады Stan.kz.
Қайғылы оқиға 16 наурыз күні түнгі сағат екіде Нұрсая шағын ауданында болды. Отбасылық жанжалдан кейін 58 жастағы әйел қызының қасында ұйықтап жатқан. Ал түнде ер адам ас үйден пышақ алып, бөлмеге кіріп, ұйықтап жатқан жұбайына соққы бере бастаған.
Қыз анасының айқайынан оянып, әкесіне тоқтауын өтінген. 11 пышақ жарақатынан әйел сол жерде көз жұмды. Сот отырысы кезінде қайғылы оқиғаның себебі қызғаныш екені анықталды.
Ер адам бірнеше жылдар бойы жұбайына опасыздық жасады деп күдіктеніп, оның қозғалысын бақылап, пәтеріне бейнекамера орнатып, оның орналасқан жерін мобильді қосымша арқылы бақылап отырған. Дегенмен опасыздық туралы ешқандай дәлел жоқ.
Айыпталушы кінәні толығымен мойындады. Бірақ ол кісі өлтіру сәті есінде жоқ екенін және сол кезде есін білмегенін айтты. Алайда сот-психологиялық-психиатриялық сараптама бұл нұсқаны растамады. Сарапшылар қылмыс кезінде ер адам өзінің іс-әрекетін түсініп, өзін басқара алатын жағдайда болды деген қорытындыға келді.
Сот бұл оқиғаны ерекше қатыгездікпен жасалған кісі өлтіру деп атады. Өйткені қылмыс қызының көзінше жасалған. Сот ер адамды 15 жылға бас бостандығынан айырды.
Сонымен қатар сот сотталған адамнан марқұмның әпкесінің пайдасына моральдық зиянның орнын толтыру ретінде 5 миллион теңге өндіріп алды. Қайғылы оқиғадан кейін ерлі-зайыптылардың 12 жасар қызы қамқоршылық органдарына берілді.
