Жасанды интеллект элементтері бар камералар республикалық маңызы бар Астана — Қарағанды — Алматы автомобиль жолының 51-шақырымында болған жол-көлік оқиғасын анықтады.
Фото: Видеодан скрин
ERNUR.KZ. ЖИ-камералар Астана — Қарағанды — Алматы тасжолындағы адам өліміне әкелген жол апатын тіркеді, деп жазады inform.kz.
Бейнежазбадан Астана қаласы бағытында қозғалып келе жатқан Mercedes автокөлігінің басып озу маневрін жасау кезінде «Газель» автокөлігімен бір бағытта соқтығысқанын көруге болады.
— Соққы салдарынан «Газель» жүргізушісі көлікті басқара алмай, жолдың жүру бөлігінен шығып кетіп, жол жиегінде аударылған. Жол-көлік оқиғасы салдарынан бір адам қаза тапты. Оқиғаның нақты себептері мен мән-жайын құзырлы органдар анықтап жатыр, — делінген хабарламада.
«ҚазАвтоЖол» жүргізушілерді белгіленген жылдамдық режимі мен жол қозғалысы ережелерін қатаң сақтауға, ал басып озу маневрін жасамас бұрын жолдағы жағдайды жан-жақты бағалауға шақырады. Жол үстіндегі бір ғана тәуекелді әрекеттің құны адам өміріне тең болуы мүмкін.
