Алматыда ер адам автобустың жолын бөгеп, жүргізушіні пышақпен қорқытқан

Автобусқа кедергі жасаған жеңіл көлік жүргізушісі төбелеспек болған. Тіпті пышақ көрсеткен. Бұл туралы куәгерлердің бірі әлеуметтік желіде жазды.

"Бүгін сағат 08:45-те ер адам №120 автобустың қозғалысына кедергі келтіріп, жолда қауіпті жағдай туғызды. Содан кейін ол автобусқа барып, жүргізушіге тап беріп, пышағын алып шықты. Шара қабылдауды және оны жауапкершілікке тартуды сұраймын", - деп жазды куәгер.

Алматы қалалық полиция департаменті жанжал шығарған адамды ұстаған.

"16 қыркүйекте сағат 08:50 шамасында "Буран-179" экипажы патрульдеу кезінде Алматы көшелерінің бірінде адам жиналғанын байқады. Автобус жүргізушісі мен жеңіл автомобиль жүргізушісі арасында жанжал болған", - дейді ведомство.

Жеңіл көлік жүргізушісі көлік қозғалысына кедергі келтіргені және төтенше жағдай жасағаны үшін, сондай-ақ ұсақ бұзақылық жасағаны үшін әкімшілік жауапкершілікке тартылды. Іс сотқа жіберіледі, дейді полиция.