TikTok балаларға қатысты дау бойынша АҚШ-қа 400 миллион доллар төлейтін болды

Фото: ChatGpt арқылы жасалды
ERNUR.KZ. АҚШ Әділет министрлігі TikTok, ByteDance және онымен байланысты компаниялармен келісімге келгенін хабарлады. Келісім балалардың интернеттегі құпиялығын қорғау туралы заң талаптарын сақтауға қатысты. Оның жалпы сомасы 400 миллион доллар, деп жазады Stan.kz.

Келісім шарттарына сәйкес, TikTok 300 миллион долларды (137 493 000 000 теңге) бірден төлейді. Келісім бойынша TikTok тағы 100 миллион доллар төлеуі керек. Бұл сома компанияның бұрын Musical.ly сервисіне қатысты АҚШ билігімен жасаған келісіміне байланысты. Ақша сот сол бұрынғы келісімнің күшін жойғаннан кейін төленеді.

АҚШ Әділет министрлігі бұл соманы Балалардың интернеттегі құпиялығын қорғау туралы заң (COPPA) бойынша қаралған істер аясындағы ең ірі төлемдердің бірі деп атады.

Сонымен қатар ведомство келісімде көрсетілген айыптаулардың әзірге тек талап-арызда келтірілген тұжырымдар екенін айтты. TikTok-тың бұл талаптар бойынша жауапкершілігі сотта дәлелденген жоқ.

TikTok-қа қандай айып тағылды?

АҚШ Әділет министрлігі TikTok-қа қарсы талап-арызды 2024 жылы Калифорнияның Орталық округі бойынша берген. Іс TikTok-тың балалардың жеке мәліметтерін жинау және пайдалану кезінде АҚШ заң талаптарын сақтаған-сақтамағанына қатысты болды.

Талап-арыз берілгеннен кейін TikTok кәмелетке толмаған қолданушыларды қорғау бағытында бірқатар функцияларын өзгертті.

АҚШ Әділет министрлігінің мәліметінше, компания қауіпсіздік шараларын күшейтіп, қолданушылардың жасын анықтауға арналған құралдарын жетілдірді және ата-ана бақылауының мүмкіндіктерін кеңейтті. Сонымен қатар өзгерістер компанияның басқару жүйесіне, заң талаптарының сақталуын бақылауға және құпиялылық ережелеріне де қатысты болды.

АҚШ Әділет министрлігі не деді?

АҚШ Бас прокурорының орынбасары Стэнли Вудворд бұл келісімді балалар мен ата-аналар үшін маңызды нәтиже деп атады.

“Бұл келісім – америкалық балалар мен ата-аналар үшін үлкен жеңіс”, – деді ол.

Вудвордтың айтуынша, АҚШ Әділет министрлігінің негізгі міндеттерінің бірі – балалардың интернетте қорғалуын қамтамасыз ету. Оған қоса азаматтардың жеке деректерін жинайтын компаниялардың заң талаптарын сақтауын қадағалау.

“Келісімнің маңызы – TikTok-тың 400 миллион доллар төлеуімен ғана шектелмейді. Компания балаларды интернетте қорғауға бағытталған қосымша талаптарды да орындауы керек”, – деді Вудворд.

АҚШ Бас прокурорының азаматтық істер жөніндегі көмекшісі Бретт Шумейт балалардың жеке дерегін жинайтын барлық компания заң талаптарын сақтауы тиіс екенін айтты.

Оның сөзінше, жасалған келісім арқылы TikTok-қа қомақты қаржылық айыппұл салынып қана қоймай, балалардың жеке деректерін қорғауға бағытталған шаралар да күшейтіледі.

Неліктен тараптар істі сотта жалғастырмады?

АҚШ Әділет министрлігінің мәліметінше, талап-арыз берілген соң TikTok балаларды қорғау және олардың құпиялығын қамтамасыз ету бағытында елеулі өзгерістер енгізген.

АҚШ билігі істі ұзақ уақыт сотта қараудың орнына келісім арқылы шешуді жөн көрді. Осылайша TikTok қомақты қаржы төлеп, балаларды қорғауға бағытталған жаңа талаптарды орындауды жалғастырады.

АҚШ Әділет министрлігінің пікірінше, бұл келісім америкалық отбасылар үшін балалардың қауіпсіздігін күшейтуге мүмкіндік береді.

Musical.ly-дің бұған қандай қатысы бар?

Қосымша 100 миллион доллар Musical.ly сервисіне байланысты. Бұл – TikTok пайда болғанға дейін жұмыс істеген әлеуметтік желі.

Бұған дейін АҚШ билігі Musical.ly-ге қатысты бөлек келісім жасаған. Енді TikTok сол ескі келісімнің күшін жоюға байланысты тағы 100 миллион доллар төлейді.

Осылайша, TikTok жалпы 400 миллион доллар төлейді. Оның 300 миллионы бірден төленсе, қалған 100 миллионы кейін түсе