Өзбекстан астанасындағы базар өртке оранды

ERNUR.KZ. Ташкент қаласының Чиланзар ауданындағы "Бешқұрған" базарында ірі өрт болды. Өртті сөндіруге екі сағаттан астам уақыт кеткен, деп жазады inbusiness.kz.

Жексенбі күні Өзбекстан астанасындағы ипподром маңында орналасқан "Бешқұрған" базарында ірі өрт болды. Төтенше жағдайлар министрлігінің хабарлауынша, хабарлама сағат 15:56-да түскен. Шамамен бір сағаттан кейін өрт оқшауланған, ал сағат 18:18-де толық сөндірілген.

Оқиға орнына Төтенше жағдайлар министрі Әзизбек Икрамов келді. Құзырлы орган жағдайды толық бақылауына алған. Белгілі болғандай, зардап шеккендер туралы ақпарат жоқ.

Әлеуметтік желілерде оқиға орнынан түсірілген сурет пен бейнежазба жарияланды. Сатушылар өрт болып жатқан сәтте дүкендерден өз тауарларын алып шығуға тырысқан. Ал адамдар базарға жақын орналасқан газ құю бекетінен алысқа қашып, көліктеріне мінуге асыққан. Жергілікті БАҚ-тың хабарлауынша, жалын сауда орталығындағы бірнеше дүкенді шарпыған. Өрт ғимараттың ішкі бөліктері мен шатырын тарады.

Өрттің шығу себептері анықталып жатыр.