Университеттегі "МАХАББАТ" ОҚУ ҮЛГЕРІМІНЕ әсер ете ме?

көрнекілік: mensagenscomor сайтынан

Университет – жаңа орта, жаңа адамдар, жаңа эмоциялар. Сол жаңа эмоцияның ішінде ең «қызықты» тақырып – қыз бен жігіт арасындағы қарым-қатынас. «Сүйіспеншілік келгенде, сабақ жайына қалады» деп ойлайтындар бар. Ал кейбіреулер керісінше, жақсы көретін адамы болса, оқу үлгерімі де бірге өседі деп сенеді. Шындыққа келсек, зерттеулер де, өмірлік тәжірибе де бұл сұрақтың жауабы біржақты емес екенін көрсетеді. Бірақ бір нәрсе анық: қарым-қатынас дұрыс құрылса – көмектеседі, дұрыс құрылмаса – кедергі болады.

Көптеген халықаралық зерттеулердің нәтижесінде қызық бір нәрсе анықталған: студенттердің 52%-ы қарым-қатынас кезінде оқу мотивациясының уақытша төмендейтінін айтқан. Себебі жаңа сезімдер, жиі кездесулер, телефонмен ұзақ сөйлесу, бір-бірін сағыну – ми энергиясын алады. Сол үшін бірінші айлар «бал айы» сияқты өтіп кетеді де, сабаққа көңіл шашыраңқы болуы мүмкін. Бұл қалыпты. Өйткені адам эмоцияны басым қояды. Алайда 3–4 айдан кейін жағдай тұрақталып, студенттер қайта оқу жүйесіне оралады.

Екінші жағынан, қарым-қатынас оқу үлгеріміне жақсы әсер ететін жағдайлар да көп. Мысалы, позитивті, қолдаушы, бір-бірінің амбициясын құрметтейтін жұптарда мотивация керісінше өседі. Бірге кітапханаға бару, бірге тапсырма орындау, бір-бірін бақылау, бірінің жетістігіне екіншісінің қуану – бәрі адамды тәртіпке шақырады. Мұндай жұптар көбіне емтихандарды жақсы тапсырады. Себебі олар өзара «команда» болып кетеді.

Бірақ мәселе қарым-қатынастың өзінде емес, оның қалай жүріп жатқанында. Егер жұп бір-бірін қызғанса, контролдап шаршатса, түн ортасына дейін жазысса, жанжал көп болса – оқу үлгерімі міндетті түрде түседі. Мұндай қатынастар энергияны алады, өзін төмен сезіндіреді, сабаққа зауқы болмай қояды. Бұл – факт. Өйткені стресс когнитивті қабілетті әлсіретеді. Яғни есте сақтау, концентрация, логикалық ойлау бәрі төмендейді.

Университеттегі ең тиімді қатынас – екеуі де жеке өмірін, оқуын, достарын, дамуын сақтай алатын қатынас. Әркімнің өз шекарасы, уақыты, мақсаты айқын болуы керек. Сонда қарым-қатынас ештеңеге кедергі емес, керісінше өмірдің бір жылы әрі қолдаушы бөлігіне айналады. Көп студентке байқалмайтын үлкен сабақ – сүйіспеншілік оқу мен өмірден орын тартып алмайды, тек орын бөлу мәдениетін талап етеді.

Қорытындылай айтқанда: университеттегі қыз-жігіт қатынасы оқу үлгеріміне әсер етеді, бірақ бұл әсер жақсы да, жаман да болуы мүмкін. Бұл тікелей қарым-қатынастың сапасына байланысты. Егер ол сіздің энергияңызды жеп қоймаса, керісінше, өз-өзіңізді жақсы нұсқаңызға айналдырса – онда еш проблема жоқ. Ең бастысы – оқуды да, махаббатты да тең ұстай білу. Ал теңдік жоқ жерде, екеудің біреуі міндетті түрде зардап шегеді.

Студенттік шақ – сезімдердің де, мүмкіндіктердің де көп уақыты. Бірақ оның екеуін де басқаруды үйренген адам ғана әрі махаббаттан, әрі оқудан ұтылмайды.