Халықаралық ОЛИМПИАДАЛАРДЫ бағындырған ҚАЗАҚ БАЛАСЫ

сурет: Даниялдың жеке мұрағатынан

Haileybury Almaty мектебінің 7-сынып оқушысы Даниял Ахметжан соңғы бір жылда өз қатарластарынан озық шығып, халықаралық деңгейде танылған жас таланттардың біріне айналды. Жасы кішкентай болғанымен, Даниялдың математика мен робототехникаға деген қызығушылығы балалық ойыннан әлдеқашан өтіп, нақты бағытқа айналған. Мұғалімдерінің айтуынша, ол сабақ кезінде де, сабақтан тыс уақытта да бір орында отырмайтын, қолы босаса робот құрастырып, басы босаса күрделі есептерді зерттеп отыратын оқушы. Оны өзгелерден ерекшелейтін қасиеті – бір нәрсеге қызықса, соңына дейін қазып, тоқтамай еңбек етуі.

2025 жылдың тамыз айы Даниял үшін ерекше есте қалды. Өйткені ол небәрі бір айдың ішінде екі бірдей халықаралық жарыста өз елінің намысын қорғап, керемет нәтижелерге қол жеткізді. Ең алдымен ол Токиода өткен Asia International Mathematical Olympiad олимпиадасына қатысып, онда Азия елдерінің ең мықты жас математиктерімен бәсекеге түсті. 22 елден келген жүздеген қатысушының арасынан суырылып шығып, қола медаль иеленуі – оның табандылығының, еңбегінің, тұрақты дайындық жүйесінің көрсеткіші. Ал олимпиада тапсырмаларының өзі оңай емес: көп сатылы логикалық есептер, күрделі мәтінді математикалық модельдер және стандартты емес әдіс талап ететін тапсырмалар. Осындай сынақтан сүрінбей өтуі – оның әлі талай биікті бағындыра алатынын дәлелдейтіндей.

Токио сапарынан кейін көп уақыт өтпей, Даниял Қытайдың Макао қаласында өткен International Robotics Competition жарысына жол тартты. Бұл жарыста ол жеке емес, команда құрамында өнер көрсетті. Роботты құрастыру, кодтау, сенсорларды дұрыс қосу, жылдам әрекет ету – бәрі бір-бірімен тығыз байланысты. Осындай ортада Даниялдың командасы “Core Values Award” марапатына ие болды. Бұл сыйлық – техникалық шеберліктен бұрын, командалық жұмыс, бір-біріне қолдау көрсету, жаңа идея ұсыну, ортақ мақсатқа жұмылу секілді адами қасиеттерді бағалайтын ерекше марапат. Яғни Даниял тек жақсы инженер ғана емес, жауапкершілігі жоғары, ұжымда лидер бола алатын тұлға екенін көрсетті.

Тамыздағы қос жеңісінен кейін оның аты түрлі білім орталықтарына, халықаралық қорларға, дарынды балалар бағдарламаларын іздейтін ұйымдарға да жетті. Сөйтіп, 2025 жылдың қарашасында Даниялға шетелден арнайы ғылым және инженерия бағытындағы оқу бағдарламасына қатысу туралы ресми ұсыныс түсті. Бағдарлама оған жеке ментор, зертханалық орта, ғылыми жобаларға ерте қатысу мүмкіндігі сияқты артықшылықтар береді. Бұл – әдетте 15–16 жастағы оқушыларға ғана ұсынылатын мүмкіндік. Ал Даниялдың небәрі 12–13 жасында осындай ұсыныс алуы – оның болашағының расында да үлкен екенін аңғартады.

Оның жетістігі тек жеке таланттың жемісі емес. Артында – еңбегі, мектептің мүмкіндіктерін тиімді пайдалана білуі, тәжірибе жинауға деген қызығушылығы және, әрине, қолдау көрсеткен мұғалімдері мен ата-анасы тұр. Даниялдың өзі де үнемі «менің жетістігім – күнделікті аз-кем болса да дайындықтың нәтижесі» деп айтады. Бұл сөздерінің өзі көптеген оқушыларға мотивация болуы мүмкін. Өйткені кейде балалар «үлгермеймін», «қиын», «басқалар мықты» деп ойлайды. Ал Даниялдың мысалы – ең бастысы жасықпау, талпыну, қызығушылықты өшірмеу және кішкентай қадамдардың өзі үлкен нәтижеге әкелетінін дәлелдейді.

Осындай оқушылар жайлы жазу – біз үшін ғана емес, жасөспірімдер үшін де маңызды. Себебі Даниял секілді балалардың тарихы «мен де тырыссам, қолымнан келеді» деген сенім береді. Әсіресе математика мен робототехникаға қызығатын, бірақ әлі өз жолын таба алмай жүрген балаларға бұл үлкен мотивация. Ертеңгі күні еліміздегі жаңа технологиялар, инженерлік жаңалықтар, ғылыми жобалар дәл осындай балалардың қолынан шығуы әбден мүмкін. Даниял Ахметжан – осы үлкен жолдың басындағы балалардың бірегейі.