Сәтбаевта 13 жастағы қыз баланы көлік қағып кетті: ол оқиға орнында қаза тапты

ERNUR.KZ. Сәтбаев қаласында қайғылы оқиға болды. Жол-көлік оқиғасы салдарынан 13 жастағы қыз мерт болды, деп жазады azattyq-ruhy.kz.

Etozhez Telegram арнасының мәліметінше, оқиға 16:00 шамасында, Ұлытау көшесінде болған. Мәліметтерге сәйкес, қыз бала алған жарақатынан оқиға орнында көз жұмған. Жол апатына не себеп болғаны анықталу үстінде.

Куәгерлердің айтуынша, қаза болған қыздың жасы 13-те болған. Көлік жүргізушісі ұсталып, уақытша ұстау изоляторына қамалған. Аталған факті бойынша сотқа дейінгі тергеу амалдары басталды.

Полиция департаментінің мәліметінше, жолда тиісті жол белгілері мен сызықтардың болмауы апаттың туындауына ықпал етуі мүмкін. Осы себепті Сәтбаев қаласы әкімінің орынбасары әкімшілік жауапкершілікке тартылды.

«Жол жұмыстарын орындау талаптарының сақталмауына байланысты, атап айтқанда, жолда тиісті таңбалардың болмауына байланысты, Сәтбаев қаласы әкімінің орынбасары жауапкершілікке тартылды», – делінген ресми мәлімдемеде.