​Қарағандыда кәсіпкер адам өліміне әкелген жол апаты үшін сотталды

0
58

Сот отырысында судья Жаңылсын Шамұратова айыпталушының кінәсін мойындағанын, бұрын сотталмағанын және Ауған соғысы ардагері екенін ескерді.


​Қарағандыда кәсіпкер адам өліміне әкелген жол апаты үшін сотталды

Фото: Айзада Агильбаева/Kazinform

ҚАРАҒАНДЫ. KAZINFORM — Қарағандыда жол-көлік оқиғасы салдарынан адамның қаза болуына байланысты сот үкімі шықты.

Кәсіпкер Сергей Камаев жол қозғалысы ережесін бұзып, абайсызда өлімге себепкер болғаны үшін кінәлі деп танылып, 2 жыл 6 айға бас бостандығынан айырылды. Сонымен қатар ол 5 жылға көлік жүргізу құқығынан айырылды.

Сот отырысында судья Жаңылсын Шамұратова айыпталушының кінәсін мойындағанын, бұрын сотталмағанын және Ауған соғысы ардагері екенін ескерді. Осыған байланысты жазаның ең жоғарғы шегінен төмен жаза тағайындалды.

Айыпталушы 2024 жылдың қыркүйегінен бері қамауда отыр. Заңнамаға сәйкес, тергеу изоляторында өткізген әрбір екі күні бір күнге теңестірілетіндіктен, оның нақты өтейтін мерзімі шамамен алты айды құрайды.

Сот үкімі әзірге заңды күшіне енген жоқ және апелляциялық шағым түсіру мүмкіндігі бар.
Бұдан бөлек, сот марқұм Ерлан Алдаңғаровтың жұбайына моральдық және материалдық шығынды өтеу үшін 11 миллион теңге өндіріп беруді міндеттеді. Бұған дейін прокуратура 13 миллион теңгеден астам өтемақы талап еткен еді.

Жәбірленуші тараптың адвокаты Мейрамғали Мұрзалиев үкімге көңілі толмайтынын, бұл шешімге қатысты шағым жолдайтынын жеткізді. Оның айтуынша, тағайындалған жаза тым жеңіл, ал заң бойынша ең жоғарғы мерзім — бес жылға дейін. Бұл жағдай жазадан жалтаруға болады деген түсінік қалыптастыруы мүмкін дейді ол. Сонымен бірге, адвокат соттың кейбір зардап шеккендерді жәбірленуші деп танудан бас тартқанын әділетсіз шешім деп бағалады.