Mitsubishi Lancer жүргізушісі бес айлық баласы бар әйелді қағып кетіп, қашып кетті.
фото:Видеодан кадрлар
ERNUR.KZ. Желіде Қызылордадағы адам өліміне әкеп соққан жол апаты туралы ақпарат тарады: Mitsubishi Lancer жүргізушісі бес айлық баласы бар әйелді қағып кетіп, оқиға орнынан қашып кеткен, деп жазады tengrinews.kz.
Арба итерген әйелді қағып, кетіп қалған
Әлеуметтік желілерде тарап жатқан мәлімет бойынша, жол-көлік оқиғасы 13 қазан күні сағат 17:10 шамасында болған.
Mitsubishi Lancer жүргізушісі 26 жастағы әйел мен кішкентай баланы қағып кетіп, оқиға орнынан жасырынғаны хабарланды. Әйел мен бала ауруханаға жеткізілген. Желідегі ақпаратқа сәйкес, бес айлық сәби алған жарақаттарынан қайтыс болды.
Қызылорда облысы полиция департаменті адам өлімімен аяқталған жол апаты және оқиға орнын тастап кету дерегі бойынша сотқа дейінгі тергеу басталғанын хабарлады.
Күдіктінің жеке басы анықталды, бірақ оны іздестіру жұмыстары әлі де жалғасып жатыр.
"Қызылорда облыстық полиция департаменті оның қайда екенін анықтау және ұстау бойынша барлық шараларды қабылдап жатыр. Қаладан шығар жолдарда өткізу режимі күшейтілді. Күдіктіні құрықтауға бағытталған жедел-іздестіру шараларына департаменттің барлық күштері мен құралдары жұмылдырылды", – деп хабарлады полиция.
Желіде тараған деректерге қарағанда, жол апаты болған сәттен бері үш тәулікке жуық уақыт өткен. Соған қарамастан, күдікті әлі ұсталған жоқ.
