Өнеркәсіп пен ауыл шаруашылығы саласының негізгі мәселелері, сондай-ақ еуразиялық экономикалық интеграцияның басқа да бірқатар өзекті мәселесі талқыланды.
ERNUR.KZ. Еуразиялық экономикалық комиссияның өнеркәсіп және агроөнеркәсіптік кешен министрі Гоар Барсегян 17 сәуірде Қазақстанға жұмыс сапары аясында ЕЭК кеңесінің мүшесі, Қазақстан премьер-министрінің орынбасары Серік Жұманғаринмен, Қазақстанның ауыл шаруашылығы министрі Айдарбек Сапаровпен, Қазақстанның сауда және интеграция вице-министрі Жанель Күшікова және Қазақстанның өнеркәсіп және құрылыс вице-министрі Жаннат Дүбіровамен кездесті, деп жазады sputnik.kz.
Гоар Барсегян Серік Жұманғаринмен өнеркәсіп пен ауыл шаруашылығының негізгі мәселелерін, сондай-ақ еуразиялық экономикалық интеграцияның басқа да бірқатар өзекті тақырыбын талқылады. Тараптар ынтымақтастықты дамытуға келісті.
ЕЭК министрінің Айдарбек Сапаровпен кездесуінде келісілген агроөнеркәсіптік саясатты іске асыру және Еуразиялық экономикалық одақ аясында Қазақстанның агроөнеркәсіптік кешенін дамыту, агроөнеркәсіптік кешенді цифрлық дамыту, ауыл шаруашылығы тұқымдарының айналымы сынды мәселелер көтерілді.
Гоар Барсегян мен Жанель Күшікова Одақ органдарының алдағы отырыстарының күн тәртібіндегі өзекті мәселелерді қарастырды. ЕЭК министрі Жанел Күшікованы одаққа мүше мемлекеттердің өнеркәсібіндегі бірлескен кооперациялық жобаларға қаржылық көмек көрсету механизмін іске асырудың өзекті мәселелері туралы хабардар етті.
Жаннат Дүбіровамен кездесуде ЕАЭО аясындағы 2030 жылға дейінгі өнеркәсіптік кооперацияның негізгі бағыттарын дамыту мәселелері талқыланды.
