Нөсер жауын салдарынан Air Astana Дубай-Астана және Дубай-Алматы рейстерін бүгінге шегерді.
ERNUR.KZ. Біріккен Араб Әмірліктерінде 75 жыл болмаған нөсер жауын жауғанын әлемдік БАҚ жазып жатыр. Дубайда жұмыс істейтін қазақ жігіті, қаладағы жағдайды айтты, деп жазады azattyq-ruhy.kz.
Жауын кезінде қоғамдық көлік қозғалысы шектеліп, метро жұмысында кедергілер туындаған. Ел билігі тұрғындарға қажет болмаса, үйден шықпауға кеңес берген.
Мемлекеттік мекемелер мен көптеген жеке меншік иелері қашықтан жұмыс істеп, ауа-райының қолайсыздығы сақталса, мектептер мен университеттердегі сабақтар онлайн өтетіні хабарланды.
Осы ретте, Дубайда жұмыс істеп жүрген қазақтарды сөзге тарттық. Мәди Дубайға жұмыс бойынша іскерлік кездесулер өткізуге барған. Ол жаңбыр құйған кезде қонақ үйге жету үшін такси таба алмай, қиналғанын айтады.
«Кеше қалада қатты жауын болып, Шейх Зайед көшесінде үлкен кептеліс болды. Оның салдарынан такси табу қиынға соқты. Біз қонақ үйге жету үшін таксиді 4 сағат күттік. Әрең дегенде қонақ үйімізге жеттік», - дейді ол.
Оның айтуынша, қазір ауа райы тұрақты, күн шайдай ашылған. Алайда Дубайда такси қызметі тоқтап тұр, жұмыс істемейді.
Қаланы әлі де су басып жатыр. Көшедегі көліктер судың көптігінен істен шығып жатыр.
