Қаражат жинауды үшінші шаһардың депутаттары бір ауыздан мақұлдап, қол ұшын созуға ниет білдірді.
Еліміздің бірнеше өңіріндегі су тасқынына байланысты Шымкент қалалық «Жастар ресурстық орталығы» ғимаратында 27 наурыздан бастап гуманитарлық көмек қабылдайтын штаб жұмыс істеп жатыр.
Шымкент қалалық мәслихат депутаттары кәсіпкерлермен бірігіп, Батыс Қазақстан облысындағы су тасқынынан зардап шеккен азаматтарға гуманитарлық көмек жөнелтті. Керуен көлігінде көрпе-төсек, жылы киім, резеңке етік, рация мен құтқару жұмыстарына қажетті заттар, сонымен қатар азық-түлік, оның ішінде макарон өнімдері, май, шәй, дәнді-дақыл түрлері бар. Қаражат жинауды үшінші шаһардың депутаттары бір ауыздан мақұлдап, қол ұшын созуға ниет білдірді.
— Батыс өңірін су алып жатқандығы баршамыздың қабырғамызды қайыстырып отыр. Еліміз үшін, халқымыз үшін қолдан келген көмекті аянып қалмаймыз. Әрине, мүлік үй бәрі қайта қалпына келтіріледі. Дегенмен, оған дейін де үйсіз-күйсіз қалған халыққа көмек керек. Сондықтан да «Жұмыла көтерген жүк жеңіл» деп қолда барымызды бөлісейік. Бір-бірімен бөлісіп, біріне-бірі қамқор, тілеулес болған ұлттың ұлылығы да осында. Су тасқынынан зардап шеккен ағайындарға гуманитарлық көмек қолын созуды азаматтық парызымыз деп білемін. Қайырымды іске кәсіпкерлер, халық қалаулылары қолдау көрсетіп жатыр, - деді «AMANAT» партиясының төрағасы Б.Нарымбетов.
Сондай-ақ керуенмен бірге көмек қолын созуға ниетті шымкенттік «Жастар рухының» белсенділері су тасқыны орын алған аймаққа аттанды. Айта кетейік, ел басына күн туғанда көмек қолын созуға ниетті жандармен бірге алаяқтар да көбейіп кетеді. Сондықтан, қоғам белсенділері көмекті тек арнайы қорға ғана жолдаған дұрыс, - дейді қоғам белсенділері.
Айта кетейік, Үкімет отырысында Төтенше жағдайлар вице-министрі Бауыржан Сыздықов елімізде 1405 үй су астында қалғанын айтқан болатын.
