«Көшеде жүрген бір ақын болса, оған қолдау жасаңдар!»
Қырғызстанда болған айтыстың төңірегіндегі дауға Президент Садыр Жапаров пікір білдірді.
Ол Мәжіліс депутаты, айтыскер ақын Аманжол Әлтаевтың үндеуіне «ыңғайсыз болды» деп баға берген.
«Біріншіден, «елші мен жыршыға өлім жоқ» дейді. Елшілер елшілігін қылады. Жыршылар, соның ішінде төкпе ақындар қай жерде болса да, өзінің ыңғайына қарай жырлай береді.Сынап жырлайды, мақтап жырлайды. Бірдеңе сұрап жырлайды. Одан кемшілік пен саясат іздеудің керегі жоқ.
Екіншіден Біржан Қалдыбаев дейтін төкпе ақын қырғызға жиен болады екен. Ал мен қазаққа жиенмін. Екеуіміз қайшылас жиен екенбіз. Менің бесінші атам Солтонқұлдың әйелі Науша апамыз қазақ қызы болған.
Үшіншіден, қазақ пен қырғыз сөз баққан елміз. Егер мен сол жерде арғымақ мінгізбей қойсам, мені сөзге жығып жырлайтын еді. «Байкем мені жаяу қайтарды, байкемнің бір арғымақтық әлі жоқ па», деуші еді. Егер мен ол жиынға қатыспасам, сөз басқа болар еді.
Сондықтан, Аманжол мырзаға айтарым, ешқандай ыңғайсыз жағдайда қалған жоқсыздар. Ешқандай саясаты да жоқ. Болғаны – төкпе ақын жиенімнің сөзіне қалмайын деп, арғымақ мінгіздім. Ал енді Біржан Қалдыбаевтың қандай ақын екенін мен де білмеймін. Бұрыннан таныс емеспін. Оны «көшедегі жүрген бір ақын» депті. Қазір көшедегі бір ақын болса, кейін қазақ пен қырғызға танымал ақын болатын шығар. «Бесіктегі баланың бек боларын кім біледі, қарындағы баланың хан боларын кім біледі», дейді. Жас бала екен. Қолдау жасасаңдар, кейін танымал, мықты ақын болатын шығар.
Біз қазақ пен қырғызды өзімізден басқа ешкім қолдамайды. Бір-бірімізді қолдайық. Қазіргі әлемдегі ахуал қиын болып тұр. Қазақ пен қырғыздың ортасына шоқ тастап жіберсек деп тұрған үшінші күштер бар. Біз оған жол бермеуіміз керек. Ортадағы ынтымақты сақтайық. Онсыз да аз халықтармыз» деді Қырғызстан Президенті.
Айта кетейік, Біржан Қалдыбаев деген жас ақын Қырғызстанға айтысқа барып, дүйім жұрттың алдында ел Президентінен сыйлыққа тұлпар сұраған болатын. Ал оның бұл тірлігіне Аманжол Әлтаев бастаған бір топ айтыскер наразылық білдіріп, «Біржан Қалдыбаев елден кешірім сұрасын» деп талап қойған еді.
