Алматы базарындағы өртке электр сымдарының қысқа тұйықталуы себеп болған

12.11.2022 12:06

817

Алматы қаласының кәсіпкерлер палатасы өрттен зардап шеккен бизнеске қор ашуға дайын.

Алматы қаласының кәсіпкерлер палатасы ТЖД қызметкерлерінен алынған ақпаратқа сүйеніп, әмбебап базар маңындағы қоймадан шыққан өртке электр сымдарының қысқа тұйықталуы себеп болғанын мәлімдеді, деп хабарлайды ERNUR.KZ.

Палатаның мәліметінше, Алматы орталық әмбебап базарындағы өрт кезінде 4 кәсіпкердің тауары бүлінді: жаңажылдық шыршалар, гирляндалар, косметика, 8 наурызға арналған сыйлықтар мен ойыншықтар.

Алматы қаласының ӨКП қызметкерлері кәсіпкерлермен үнемі байланыста, залал сомасы анықталып жатыр.

Алматы кәсіпкерлер палатасының директоры Айтуар Қошмамбетовтың айтуынша өртке электр сымдарының қысқа тұйықталуы себеп болған.

"Егер бизнеске консультациялар, сақтандыру төлемдері, жалға берушілермен келіссөздер жүргізу бойынша қандай да бір көмек қажет болса, біздің мамандар бұл жұмысқа қосылуға, қызметкерлердің құқықтарын қорғау бөлігінде құқықтық, қаржылық сипаттағы консультациялар беруге дайын. Қажет болса, біз қор ашамыз", - деді ол.

Еске сала кетейік, 11 қараша күні сағат 10:55-те Жетісу ауданында "Турист" ЖШС мен"Саяхат" ЖШС-ға тиесілі қойма үй-жайларынан өрт шықты, өрт 1,5 мың шаршы метр аумақта оқшауланды.