«Жұлдыз» индустриялық аймағынан 3600-ден астам жаңа жұмыс орны ашылады деп күтілуде.
Шымкент қаласында индустриялды аймақтардың қатары артып келеді, деп хабарлайды ERNUR.KZ.
Қазіргі таңда жаңа «Жұлдыз» индустриялды аймағы мен «Бозарық» тамақ өнеркәсібі агро-индустриялық аймағын құру жұмыстары жүргізілуде.
2021 жылы құрылған «Жұлдыз» индустриялық аймағының жалпы ауданы – 306 га. Аталған аймақта 35 жоба жүзеге асырылуда. Жоспарға сәйкес, биыл 6 жоба іске қосылып, 450-ден астам азамат тұрақты жұмыспен қамтылады.
Бұл бағыттағы жұмыстар өз деңгейінде атқарылуда. Сондай-ақ, 2022-2026 жылдар аралығында «Жұлдыз» индустриялық аймағынан 50 компанияның инвестициялық жобалар пулы әзірленді. Осыған орай, тағы 3600-ден астам жаңа жұмыс орны ашылады деп күтілуде.
Мемлекет басшысының еліміздегі азық-түлік қауіпсіздігі және бағаны тұрақтандыру мәселесіне байланысты қойған нақты тапсырмасына сәйкес, қалада ауыл шаруашылығы өнімдерін терең өңдейтін өндірістік алаңдарын дамыту қолға алынған. Бүгінгі таңда жалпы аумағы 132 га «Бозарық» тамақ өнеркәсібі агро-индустриялық аймағының инженерлік-инфрақұрылым жүйелерінің құрылысы жалғасын табуда. Биыл іске қосылатын индустриалды аймақта тамақ өнеркәсібімен айналысатын жалпы құны 29,5 млрд теңгені құрайтын 30 инвестициялық жоба жүзеге асырылады. Мұнда 1 жарым мыңға жуық жаңа жұмыс орны құрылады.
Аталған аймақта 15 шақырымға суаққы қойылып, электр жүйесін тарту жұмыстары қарқын алған. Инженерлік-инфрақұрылыммен қамту толығымен 2023 жылдың соңына дейін аяқталады. Мұрат Дүйсенбекұлы жауаптыларға қосалқы станцияны іске қосып, кәсіпорындарды электр энергиясымен қамтуды тездету қажеттігін ескертті. Сондай-ақ инфрақұрылым жүйелерін биыл 90 пайызға аяқтауды тапсырды.
Шаһардағы бұдан өзге 2 индустриялы аймақ пен сауда-логистикалық орталықта 16 жоба жыл соңына дейін іске қосылып, 600-ге жуық жаңа жұмыс орны ашылатын болады.
