Үкімет табиғи монополистердің өтініштерін уақтылы қарамағаны үшін әкімшілік жауапкершілікті енгізуді көздеп отыр.
ERNUR.KZ. Үкімет жер телімін беруді кешіктірген жауапты тұлғаларды жұмыстан босатуға дейін әкімшілік жауапқа тартуды көздеп отыр, деп жазады zakon.kz.
Үкімет табиғи монополистердің өтініштерін уақтылы қарамағаны үшін әкімшілік жауапкершілікті енгізуді көздеп отыр. Бұл жөнінде премьер-министр Әлихан Смайылов Цифрландыру мәселелері жөніндегі комиссияның кезекті отырысында айтты.
"Біз әр өңірдегі жағдайды жан-жақты қараймыз. Егер жаңа жылдан бастап адамдарға рұқсат беру тұрып қалатын болса, өңірлердегі тиісті жауапты тұлғаларды жұмыстан босатуға дейін жауапқа тартамыз. Біз аталған мемлекеттік қызметті ашық қылып, цифрландырғымыз келеді, ал бас жоспарлар мен ЕЖЖ қазіргі мәліметтерге сәйкес келмейді. Сондықтан көп жағдайда автоматты түрде рұқсат берілмей жатады. Бірақ, біз кері шегінбейтінімізді ерекше атап өткім келеді. Бәрібір алға жүреміз. Бұл процесті тежейтіндерді жұмыстан шығарамыз. Олардың орнына өз қызметін лайықты атқаруға бел буған адамдарды қою керек".Әлихан Смайылов
Үкімет басшысы жер қатынастарын цифрландыру мәселесі инвестициялық ахуалға, сәйкесінше, жаңа бизнес жобаларды іске қосу мен жұмыс орындарын ашуға тікелей қатысты екенін айтты. Сондықтан цифрландырудың экономиканы одан әрі дамыту үшін маңызы зор.
Премьер-министрдің айтуынша, талдау нәтижесінде әкімдіктер жүктеген цифрлық деректердің барлығы талапқа сай емес екені анықталған. Атап айтқанда, қолданыстағы бас жоспарлар мен егжей-тегжейлі жоспарлау жобаларына (ЕЖЖ) түзету енгізу қажет. Сонымен қатар платформада өтінімдерді уақтылы қарамау және негізсіз бас тарту фактілері анықталды.
"Цифрландырудың өзі дәл осы сыбайлас жемқорлықты азайтуға және қате деректер көлемін қысқартуға, сәйкес келмейтін координаттар бойынша жер телімдерін беру фактілерін жоюға бағытталған. Бұл мәселелердің барлығы цифрландыру нәтижесінде шешілуі тиіс», — деді".Әлихан Смайылов
Айта кетерлігі, таңдау, өтінім беру мен тіркеуден бастап жер телімдерін берудің бүкіл процесі электронды форматқа көшірілді. Барлық бизнес-процестер толығымен қайта қаралды. Қажетті қадамдар саны бірнеше есеге азайтылды, мемлекеттік қызмет көрсету мерзімі шамамен 1 жылдан 30 күнге дейін қысқарды.
Жалпы, 1 шілде мен 28 қараша аралығында ЖБМК арқылы 1 млн-нан астам қызмет көрсетілді, оның ішінде 238 мың кадастрлық төлқұжат берілді. 25 млн-нан астам анықтама мен мәлімет қызмет алушылардан өтініш бермей-ақ алынды.
