«ҚазАвтоЖол» ҰК» АҚ жол қызметі күшейтілген режимде тасқынды алдын алу шараларын ұйымдастырып, суды ағызу, инертті материалдарды жеткізу және жасанды бұғаттау біліктерінің құрылыс жұмыстарын атқарып жатыр.
«ҚазАвтоЖол» СҚО-ға 32 бірлік арнайы техниканы жөнелтті, деп хабарлайды ERNUR.KZ.
"2024 жылғы 14 сәуірде «ҚазАвтоЖол» ҰК» АҚ Солтүстік Қазақстан облысына жолды және жақын елді мекендерді су алу қаупін алдын алу мақсатында әр филиалдан 32 бірлік арнайы техниканы (31 қотарғыш және 1 жүк тиегіш) жөнелтті", - делінген хабарламада.
Естеріңізге сала кетейік, 2024 жылғы 13 сәуірде республикалық маңызы бар А-16 «Жезқазған-Петропавл, Арқалық арқылы өтетін» тас жолының 954 шақырымы және Р-49 «Петропавл қаласы айналма жолы» тас жолының 11 шақырымының қиылысында еріген қар суы мен тасқын салдарынан жол бөлігін су алды. Оның ұзындығы 1500 метрді, ал тереңдігі 1 метрді құрады.
Қазіргі таңда осы учаскеде «ҚазАвтоЖол» ҰК» АҚ жол қызметі күшейтілген режимде тасқынды алдын алу шараларын ұйымдастырып, суды ағызу, инертті материалдарды жеткізу және жасанды бұғаттау біліктерінің құрылыс жұмыстарын атқарып жатыр.
Осы жұмыстарға 23 бірлік арнайы техника мен 63 адам жұмылдырылды.
