Scania автобусы Қазақстанда тіркелген. Ол Нижний Новгородқа Өзбекстан азаматтарын тасымалдаған.
ERNUR.KZ. Ресейдің Самара облысында түнде адам өмірін қиған жол апаты болды, алдын ала мәлімет бойынша Өзбекстан азаматтары қаза тауып, жараланған, деп жазады sputnik.kz.
8 сәуір күні сағат 1:00 шамасында Самара облысының Кинель ауданында автобус жол апатына ұшырады.
"Алдын ала мәлімет бойынша Scania автобусының жүргізушісі қауіпсіз жылдамдықты сақтамай, Урал - Муханово тас жолының 26-шақырымында жолдан шығып, аударылып кеткен. Оқиға орнында екі жолаушы қаза тауып, он адам медициналық мекемеге жеткізілді", - делінген Самара облысы жол қозғалысы қауіпсіздігі мемлекеттік инспекциясының хабарламасында.
Scania автобусы Қазақстанда тіркелген, деп хабарлады Ресей ІІМ Самара облысы бойынша Бас басқармасы мемлекеттік автоинспекциясының бастығы Юрий Некрасов. Ол Нижний Новгородқа Өзбекстан азаматтарын тасымалдаған.
