Бірқатар арнайы операцияларды жүзеге асырған іскер менеджер банктің ақпараттық жүйесін заңсыз пайдаланып, клиенттің картасын өзінің мобильді қосымшасына қосып, кейін оған жаңа картаны ұсынған.
Көкшетауда банк менеджері клиенттің ақшасын өз пайдасына жаратып, кроссовки сатып алған, деп хабарлайды ERNUR.KZ Polisia.kz сайтына сілтеме жасап.
Көкшетау қалалық полиция басқармасына 19 жастағы жергілікті тұрғын хабарласып, оның банк картасынан ақша жоғалып кеткенін мәлімдеген. Айтуынша, бұл картамен ол ешқандай банктік операциялар жүргізбеген.
Жедел уәкілдер бұл іске бірден қызығушылық танытты. Барлық қажетті мәліметтерді жинаған полиция жергілікті банктердің біріндегі менеджердің жеке жинақтарды ұрлауға қатысы барын анықтады. Оған өтініш беруші ақша жоғалғанға дейін бір күн бұрын жүгінген.
Белгілі болғандай, бір күн бұрын қыз бала жоғалып кеткен банктік картаны қайта шығару қызметін алу үшін банкке келген. Бірқатар арнайы операцияларды жүзеге асырған іскер менеджер банктің ақпараттық жүйесін заңсыз пайдаланып, клиенттің картасын өзінің мобильді қосымшасына қосып, кейін оған жаңа картаны ұсынған.
Сол күні жұмыстан шығып, 26 жастағы ер азамат жергілікті дүкендердің біріне барып, жәбірленушінің ақшалай қаражатына өзіне 49 190 теңгеге спорттық кроссовкаларды сатып алған. Аталған факті бойынша полицейлер ҚР ҚК 188-бабы 2-бөлігі (Ұрлық) бойынша сотқа дейінгі іс жүргізуді бастады.
