Ал жол бойындағы дәмханалар мен демалыс орындары ас атасын 160-185 теңгеден асырмаған.
Ақтөбе облысында ақтүтек боранда нан бағасын қымбаттатып пайда таппақ болған алыпсатарлар пайда болды. Қарабұтақ ауылы тұсында үш күн бойы тұрып қалған көлік жүргізушілері ауыл әкімінің келуін талап етті, деп хабарлайды ERNUR.KZ КТК арнасына сілтеме жасап.
Самара - Шымкент тас жолының Хромтау қаласы мен Қобда ауылына дейінгі аумағында жүзге жуық көлік кептелісте қалыпты. Бораннан жолдың жабылуына байланысты не әрі, не бері қатынай алмай тұрған. Осы кезді пайдаланған пысықайлар бір бөлке нанды 1300 теңгеден саудалаған. Бірақ аудан басшылары жолда қалғандарға қымбат баға ұсынған кімдер екенін сол күйі анықтай алмады.
Ал жол бойындағы дәмханалар мен демалыс орындары ас атасын 160-185 теңгеден асырмадық деп отыр. Олардан кінә жоқтығын жүргізушілер де растаған.
Күре жолды қардан аршып отырғанымен, ұйытқыған боран қайта басып тастайды. Кептелісті сейілту үшін көліктерді топтап-топтап өткізіп жібермекші.
Ал Ақтөбеден шығар тұста Өзбекстан азаматтары мінген алты автобус боранда қарға батып қалған. Жолаушылар арасында он бала бар. Оларға қажетті ас-су мен дәрі дәрмек жеткізіліп, шетелдіктер сапарын жалғастырыпты.
"Көбі өзбек елінің азаматтары, ішінде кәмелетке толмаған балалар бар. Полиция қызметкерлерімен бірлесіп, дәрі-дәрмек, азық-түлік жеткізіп бердік. Еріктілер, "Казсервис" мекемесінің қызметкерлері де көмектесті", - дейді Алматы ауданының әкімі Асланбек Сүйіншәлиев.
