Жол апаты салдарынан үш көліктің жүргізушісі зардап шекті.
ERNUR.KZ Ақмола облысында жантүршігерлік жол апатынан екі бала – екі және үш жасар қыздар көз жұмды, деп жазады Sputnik Қазақстан.
Бірінші жол апаты Нұр-Сұлтан-Петропавл автожолының 261-ші шақырымында болды.
"Шевроле Кобальт" көлігінің 34 жастағы жүргізушісі Щучинсктен Көкшетауға қарай келе жатып рөлге ие бола алмай қалған. Ол бөренеге соғылады, салдарынан 2019 жылы туған қыз қаза болды, жүргізуші мен төрт жолаушы зардап шекті. Олар арасында 8 және 2жасар бала бар", - деді Ақмола облысы полиция департаментінің баспасөз қызметі.
Целиноград ауданында болған тағы бір жол апатынан екі жасар бала мерт болды.
Нұр-Сұлтан-Ерейментау-Шідерті автожолының 63-ші шақырымында үш көлік соқтығысқан. "Тойота Люсида" көлігінің жүргізушісі, 36 жастағы елорда тұрғыны рөлге ие бола алмай, жыраға аударылып қалады. Көмек көрсетуге тоқтаған "Тойота Альфард" көлігіне рөлінде 46 жастағы Павлодар тұрғыны отырған "Тойота Камри" автокөлігі соғылады.
Жол апаты салдарынан үш көліктің жүргізушісі зардап шекті. "Тойота Камри" көлігінде болған кішкентай қыз жедел жәрдем ішінде көз жұмды.
Полиция кезекті рет жүргізушілерді ауа райы туралы дабылды ескертулерге және жолдардың жабылғаны жайлы хабарламаларға назар аударуға шақырады.
