Штат үкіметі оқиғаға қатысты тергеу жүргізуді тапсырды.
ERNUR.KZ. Үндістанның Махараштра штатындағы ауруханада бір күнде 12 сәби көз жұмды. Сейсенбі күні оппозициялық саясаткерлер аймақтық билік пен аурухана басшылығын өрескел бұзушылық жасады деп айыптады, деп жазады ҚазАқпарат.
Жергілікті БАҚ-тың хабарлауынша, сол жексенбіде Үндістанның ірі мегаполисі Мумбайдан шамамен 600 км (373 миль) қашықтықта орналасқан Нандед ауданындағы Шанкаррао Чаван ауруханасында қант диабеті, бауыр және бүйрек жеткіліксіздігі сияқты әртүрлі диагнозбен ауырған бірден 12 ересек адам қайтыс болды.
Туыстарының айтуынша, жексенбі күні аурухананың нәрестелер бөлімшесі толып кетті, ал бір жаңа туған нәрестені күтуге арналған инкубаторға бірден төрт-бес нәресте жатқызылған.
Аурухана өкілдерінің айтуынша, дәрі-дәрмек пен дәрігерлер тапшылығы болған жоқ.
Науқастарға тиісті күтім көрсетілді, бірақ оларға ем қонбай, қайтыс болған.
Сейсенбі күні Махараштра үкіметі нәрестелер мен ересек пациенттердің өліміне қатысты тергеу басталғанын хабарлады.
— Жиырма төрт өлім — бұл өте көп. Неліктен бір күнде сонша адам қайтыс болды? Бұл дәрі-дәрмектің жетіспеушілігінен бе, кадр тапшылығынан ба, әлде басқа себептері бар ма — бәрін анықтаймыз», — деді тілшілерге мемлекеттік министр Гириш Махаджан.
Жексенбі күні хабарланған жаппай кісі өлімі — Махараштрада соңғы бірнеше айда болған екінші оқиға. Тамызда Тане ауданындағы мемлекеттік ауруханаға түскен 18 адам 24 сағат ішінде қайтыс болды, деп хабарлады жергілікті БАҚ.
Штат үкіметі оқиғаға қатысты тергеу жүргізуді тапсырды.
