Түркістанда «Тайқазан» гастрономиялық фестивалі өтеді

0
650

20-дан астам үздік мейрамхана мен дәмханалар ұлттық тағамдар, жергілікті деликатестер мен стрит-фуд тағамдарын ұсынады.


Түркістанда «Тайқазан» гастрономиялық фестивалі өтеді

Түркістанда Наурыз мерекесіне орай «Тайқазан» гастрономиялық фестивалі өтеді, деп хабарлайды ERNUR.KZ.


Түркістан қаласындағы «Ұлы Дала Елі» орталығының алаңында 22 наурыз күні сағат 12:00-19:00 аралығында «GASTRO FEST TURKISTAN-2023» атты ауқымды гастрономиялық фестиваль өтеді.


Аталған іс-шараны Түркістан облыстық Туризм басқармасының «Open Turkistan» туристік ақпараттық орталығы өткізеді. Шарада қаланың 20-дан астам үздік мейрамханасы мен дәмханалары ұлттық тағамдар, жергілікті деликатестер мен стрит-фуд дәмділерін ұсынады.


Фестивальде арнайы концерттік бағдарлама ұйымдастырылып, онда күні бойы ойындар, жылдам тамақтану бойынша конкурстар, жергілікті аспаздардың шеберлік сыныптары, балаларға арналған ойын-сауық бағдарламалары өтеді. Сондай-ақ, фестивальде туристер үшін Түркістанның «дәмін татуға», өңірдің қонақжайлылығын сезінуге, қазақтың ұлттық тағамдарының тарихын білуге, естен кетпестей тамаша уақыт өткізуге мүмкіндік болмақ.


Фестивальдің тағы бір ерекшелігі – бонус ретінде GastroFest гастро-картасы тегін ұсынылады. Бұл гастрономиялық картада қаладағы үздік дәмханалардың мәліметтері жиналған. Сіз Түркістанда ең дәмді палаудың дәмін қайда татуға болатынын, қай мейрамханада тәтті десерттер дайындалатынын көре аласыз.