Балғынбек Имашев: "Халық жауы" қылсаңдар да осы пікірде қаламын!

0
3 023

"Мен екпеге қарсымын!" - дейді айтыскер ақын.


Балғынбек Имашев:

Атақты айтыскер Балғынбек Имашев өзінің екпе салдыруға қарсы екенін айтып, басқаларға да хорлық болмауын талап етуде. Ол әлеуметтік желіде парақшасына "Мектептерде екпе салдыруға қысым жасап жатыр" деген видеоны жариялап, төмендегідей жазба жариялады.

Балғынбек Имашев: "Вакцина салдыру ерікті түрде деген бос сөз болғаны ма?

Біздің биліктің сөзіне сенуге болмайтын сияқты.
"Мектеп директорларын "қамшылау" керек" деген не масқара?
Қайдасыңдар, батыр қазақтың ерлері мен қыздары? Елдің көз-жасына қалудан қорқатын басшы қалмаған ба? Мекеме басшылары! Әр түрлі деңгейдегі әкім-қара, шенеунік, директор, ректор, т.б қызметтегі азаматтар!
Алланың алдында қол астыларыңдағы әр адамның хақынан сұраласыңдар!

Вакцина алдым деп жаһанға жар салған желідегі жарнамашылар! Не үшін? Ешкім қыстамаса, өтінбесе, сұрамаса, талап етпесе, белгісіз екпені не үшін, кім үшін насихаттап жатырсыңдар? Рамазан айы ғой. Өтірік ақталмаңдар! Алла жүректеріңдегі сырды біледі. Көбің кресло үшін, басшыға жағу үшін салдырдыңдар! Денсаулық үшін емес! Бәріңнің жүректеріңде күмән бар! Көбің тәуекелге бардыңдар.

Өзіңнің артың шыдамады, мақұл. Енді басқаларды зорламасаңдаршы!!!
Маған дайректке жазып жатқандар жетеді. "Амал жоқ, жоғарының бұйрығымен, қоқан-лоққысымен салдыруға мәжбүрміз" дейді.
Өз еркімен салдырғандарға қарсы айтарым жоқ.
Бірақ, олардың саны аз ғой. Көбі амалсыз салдыруда.


Мен екпеге қарсымын! Бүгін "халық жауы" қылсаңдар да осы пікірде қалам. Қайда менің Ата Заңыммен кепілдік берілген құқығым?
Мен, сондай-ақ, ЛГБТ-ның насихатына, жеріміздің талан-таражға түсуіне, отбасымның тәрбиесіне қол сұғылуына, діни сенім бостандығыма қол сұғылуына, ұлттық сал-дәстүрімді "ескілік, жабайылық" саналуына, Ана тілімнің тұқыртылуына қарсымын!!!
Бас санитардың шешімі, Денсаулық министрлігінің бұйрығы - Ата заңымдағы құқығымнан жоғары емес!".

Осылай деген айтыскен президентке де үн қатып, "Құрметті, Қасымжомарт Кемелұлы! Сіз Мемлекет басшысы ретінде осы елдегі әрбір заңбұзушылықты тиюға, жол бермеуге тиістісіз!" деп жазды.

Оның бұл жазбасын оқыған оқырмандардың басым бөлігі оны қолдап, "Жарайсыз, Балғынбек мырза. Сіз сияқты азаматтар қорғамаса қарапайым халықты кім қорғайды? Естір құлақ болса өте орынды айттыңыз", "Балғынбек аға, дұрыс айтасыз! Мен де қарсымын екпеге, мектепте мұғалім болып жұмыс жасаймын, жұмыстан шығарса да салғызбаймын деп бас тарттым! Алла разы болсын сізге" деген ойларын жазған.