Жан-жағыңызға зер салсаңыз көңілі түсіңкі, қабағы қатулы, ұйқысы қанбаған, шаршап жүрген жанды көресіз. Мұның бірден бір себебі – ағзадағы дәрумен мен минералды заттардың аздығы. Оның орнын толтыру үшін төменде жазылған 6 әдісті қолданыңыз.
фото: tampabaysmix.iheart.com
Көктемгі шаршау мен әлсіздікке уақытша ғана қолайсыздық деп қарауға болмайды. Қалжыраған ағзаға аздап көмектесіңіз. Қажетті дәрумендерді ішіңіз, балғын жемістер мен көкөністерді көбірек жеңіз. Таза ауада жиі серуендеп, кешке 5-10 минуттай жаяу жүріңіз. Бұл көктемгі келеңсіздіктерден арылып, бойыңызды қуаттандыруға күш болады.
фото: fotokto.ru
Адамтамыр (женьшень) – жалпы қан айналымды реттейді. Ағзаның ауруға қарсыласуын күшейтеді, қан қысымын қалпына келтіреді, жыныс жолдарындағы ауруларды емдейді әрі жүйке жүйесін жақсартады.
Ол үшін күніне 3 рет 15-25 тамшы адамтамыр тұнбасын ішу керек. Емді тамақтанудан жарты сағат бұрын жүргізесіз.
Сермене (лимонник) – тыныс жолдарын, көру қабілетін, қандағы қант мөлшерін, қан тамырларын, асқазан жарасын емдеу үшін кеңінен қолданылады.
Аты аталған аурулардан алыс болу үшін күніне 15-20 тамшы сермене тұнбасын ішесіз.
Емді күніне 3 рет тамақтанудан 30 минут алдын қабылдаңыз.
Маралтамыр (левзея) – бауыр ауруына керемет емдік шөп. Сонымен қатар қан тамырларды кеңейтеді, гемоглобинді көтереді.
Емдік үшін 1 ас қасық суға 20-30 тамшы маралтамырды қосып ішесіз. Емді күніне 3 рет тамақтан алдын жүргізу керек.
Қызғылт семізот (родиола розовая) – орталық жүйке жүйесіне пайдалы. Жүрегі ауыратындарға таптырмайтын дәрі. Әсіресе жас балалардың ағзасын қуаттандырады. Жұмысқа қабілеттілікті арттырып, зат алмасуды жақсартады. Есте сақтау қабілетіңізді жоғарылатып, көңіл-күйіңізді көтереді.
Ем үшін 5 тамшыдан 25 тамшыға дейін қабылдайсыз. Емді күніне 3 рет тамақтанудан 30 минут алдын жүргізесіз.
1 ас қасық кептірілген итмұрынды (шиповник) 0,5 литр қайнаған суға салып, отқа қоясыз. 10 минуттай қайнатып алып, жылы орап тұндырып қойыңыз. Шамамен 1 сағаттан соң дайын болған тұнбаны сүзіп алып, жарты стақаннан күніне 3 рет ішесіз. Емді тамақтан алдын қабылдау керек.
Дәмі ұнамаса аздап бал немесе қант қосуға болады.
1 ас қасықтан жалбыз (мята), киікоты (дущица), жебіршөп (чабрец), шайқурай (зверобой), таңқурай (малина), шетен (рябина), қойбүлдірген (земляника) және қарақат (смородина) үгіндісін араластырыңыз. Оны 1,5 литр қайнаған суға салып, отқа қоясыз. 5 минуттай қайнаған соң қақпағын мықтап жауып тұндыру керек. Шамамен 30-40 минуттан соң дәруменге бай сусынды сүзіп алып, 1 стақаннан күніне 3 рет ішіңіз.
Көктем мезгілінде дастарханыңыздан пиязды, сарымсақты, ақбас қырыққабатты, балғын жемістер мен көкөністерді үзбеуге әдеттеніңіз.
Ескерту! Халық емін қолданбас бұрын міндетті түрде дәрігермен кеңесіп алыңыз.
Ләззат АХМЕТОВА,
Тағы оқыңыз:
ДӘРУМЕНСІЗДІК билеген бойды қуаттандыратын ДӘРУМЕН
